Memleket basshysy Qasym-Jomart Toqaev bıylǵy jyldy «Balalar jyly» dep jarııalap, balalarǵa erekshe nazar aýdarý qajettigin atap ótken bolatyn. Osyǵan oraı Taraz qalasyndaǵy «Anaǵa taǵzym» ortalyǵynda «Mádenıetti ana – mádenıetti ult» jobasynyń aıasynda balalarǵa arnalǵan otbasylyq «Anammen birge kitap oqımyn» atty shyǵarmashylyq baıqaýy ótti.
Ortalyq dırektory Elmıra Myrza-Ǵalıdiń aıtýynsha, baıqaýdyń negizgi maqsaty – jastardyń shyǵarmashylyq qabiletin shyńdap, ana men balanyń arasyndaǵy qarym-qatynastyń nyǵaıýyna úles qosý arqyly qazaq ádebıetindegi shyǵarmalardy nasıhattaý bolyp otyr. Baıqaýdyń sharty boıynsha Taraz qalasynda turatyn 12 jastan 16 jasqa deıingi jasóspirimder anasymen birge qazylar alqasy bekitken 9 ádebı kitapty oqyp, óz oılaryn beınejazbaǵa túsirip, áleýmettik jelige jarııalaýǵa tıis. Al ekinshi kezeńge ótken qatysýshylar úsh aı boıy oqyǵan ádebı shyǵarmalaryn qorytyp, ana men bala bul kitaptardan alǵan áserin qaǵaz betine túsirip, bir-birine syrlasý hatyn jazýy kerek. Baıqaýǵa qatysýshylar hat jazý arqyly ózderi oqyǵan ádebı shyǵarmalardy taldap, oqyrman nazaryna usyndy.
Kezdesýde Halyqaralyq «Alash» ádebı syılyǵynyń laýreaty, jazýshy-dramatýrg Elen Álimjan ana men bala, jalpy bolashaq urpaq úshin bul baıqaýdyń mańyzdylyǵyn atap ótip, balalarǵa óziniń «Anajar» kitabyn syıǵa tartty. Al qazylar alqasynyń múshesi, fılologııa ǵylymdarynyń kandıdaty Seısekúl Ismatova árbir beınejazba men hattardan ózgeshe áser alǵanyn, qazaq ádebıetin, qazaqtyń sóz ónerin qurmetteıtin býynnyń ósip kele jatqanyn jetkizdi. Baıqaý qorytyndysy boıynsha birinshi oryndy oqýshy Bekasyl Esirkep pen anasy Elmıra Esirkepova jeńip aldy. Sondaı-aq ekinshi oryndy Arýjan Baıraqy men anasy Sáýle Muhamedrahymqyzy jáne Káýsar Qaıyr men anasy Gúlmıra Ahmaǵanbetova ıelendi. Júldeli úshinshi oryn Mereı Tursynbek pen anasy Aızat Kóshkinbaeva jáne Dına Maerbek pen anasy Janar Túmenovaǵa buıyrdy. Sonymen qatar 5 oqýshy «Zerdeli» nomınasııasymen marapattalsa, qazylar alqasynyń sheshimine sáıkes Aıhanym Qaırat pen anasy Úmit Anarbaevaǵa da arnaıy júlde tapsyryldy. Baıqaý jeńimpazdary men júldegerlerine qarjylaı syılyq berildi.
Jıyn sońynda kelýshiler «Anaǵa taǵzym» ortalyǵynyń foıesinde ornalasqan Taraz qalalyq ortalyqtandyrylǵan kitaphanalar júıesiniń «Kitaptar qalashyǵyna saıahat» kórme-ınstallıasııasyn aralap kórdi. Sonymen qatar kópshilik «Mıras» ata dástúr zalynda ulttyq kıim úlgilerin nasıhattaý maqsatynda uıymdastyrylǵan «Kıeli kımeshek» kórmesin de tamashalady.
Jambyl oblysy