Memleket basshysyna elimizde zańdylyqtyń saqtalý jaǵdaıy men qadaǵalaý qyzmetiniń mańyzdy baǵyttaryna qatysty jumystardyń negizgi qorytyndysy jóninde esep berildi, dep habarlaıdy Egemen.kz Aqordanyń resmı saıtyna silteme jasap.
Bas prokýror Berik Asylovtyń aıtýynsha, jyl basynan beri prokýratýra qabyldaǵan sharalardyń nátıjesinde 7 myńnan astam zań buzýshylyq joıylǵan. Onyń kóbi memlekettik satyp alýlar, densaýlyq saqtaý, ekologııa jáne balalardyń quqyqtaryn qorǵaý salalarynda anyqtalǵan. 10 myńnan astam memlekettik qyzmetshi men kvazımemlekettik sektordyń qyzmetkeri ákimshilik jáne tártiptik jaýapqa tartylǵan. Prokýratýranyń aralasýynan keıin memleketke 8,4 mıllıard teńge qaıtarylǵan, 177 myńnan astam eńbek quqyǵy qalpyna keltirilgen, sondaı-aq 1 mıllıard teńgeden astam jalaqy qaryzy ótelgen.
Prezıdentke krımınogendik jaǵdaılar jáne azamattardyń konstıtýsııalyq quqyqtaryn qamtamasyz etý úshin qylmystyq-quqyqtyq salada qabyldanyp jatqan sharalar jóninde aqparat berildi. Prokýrorlar zańsyz ustalǵan 596 azamatty bosatty. 542 azamatqa qatysty sheshimdi qaıta qaraý usynyldy, sonyń ishinde sottalǵan 90 adamnyń jaǵdaıy jaqsartylyp, 9 adam aqtaldy.
Qasym-Jomart Toqaevqa qylmystyq prosestiń jańa úsh býyndy modeliniń engizilý barysy jóninde arnaıy baıandaldy. Bıyl prokýrorlar 152 myń prosessýaldyq sheshimdi qaıta elekten ótkizdi. Sonyń ishinde 11,5 myńnan astam qaýly zańsyz dep tanyldy. 1 myńǵa jýyq azamattyń qylmystyq proseske negizsiz tartylýyna jol berilmedi.
Berik Asylov Memleket basshysyna bıznesti qorǵaý, ásirese zańsyz qylmystyq qýdalaýǵa jol bermeý úshin qabyldanyp jatqan sharalar jóninde jan-jaqty baıandady. Prezıdenttiń tapsyrmasy boıynsha prokýrorlar kásipkerlerge qatysty qozǵalǵan barlyq qylmystyq istiń zańdylyǵyn tekserip jatyr. Júrgizilgen tekserister nátıjesinde óndiristegi 378 istiń 36-sy toqtatyldy. Bızneske kedergi jasaý, quqyq qorǵaý jáne basqa da memlekettik organ ókilderi tarapynan qyzmetin asyra paıdalaný faktileri boıynsha 12 sotqa deıingi tergeý amaldary júrgizilýde. Materıaldardy tekserý áli de jalǵasyp jatyr.
Kásipkerlerdiń qylmystyq proseske negizsiz tartylýyn boldyrmaý maqsatynda uıymdastyrýshylyq jáne zańnamalyq sharalar kesheni ázirlenýde.
Memleket basshysyna qańtar oqıǵasyna baılanysty tergeý amaldarynyń barysy týraly arnaıy baıandaldy. Búginde 489 azamatqa qatysty is sotqa joldanǵan. 331 adam, negizinen urlyq, tonaýshylyq, qarý saqtaý jáne urlaý derekteri boıynsha sottalǵan. Tek 23 adamǵa qatysty bas bostandyǵynan aıyrý týraly naqty sheshim shyqqan, qalǵandaryna jeńil jaza kesilgen. Ruqsat etilmegen tergeý amaldary men jappaı tártipsizdik kezinde qaza bolǵandarǵa qatysty ister erekshe baqylaýǵa alynǵan.
Qasym-Jomart Toqaev qańtar oqıǵasynyń sebebin jan-jaqty tekserip, oǵan kinálilerdi obektıvti túrde anyqtaý, sondaı-aq tergeý qorytyndysy jóninde jurtshylyqqa turaqty aqparat berý qajet ekenin atap ótti. Budan bólek Prezıdent elimizdiń áleýmettik jáne ekonomıkalyq ómiriniń barlyq salasynda zańdylyqty qamtamasyz etýdiń asa mańyzdy ekenin aıtty.