Eýropalyq Odaq mobıldik telefondarǵa qosylatyn qurylǵylardyń biryńǵaı standartyn qoldaný týraly sheshim qabyldady. 2024 jyldyń kúzine qaraı zarıadtaý qurylǵylary, qulaqqap, kolonka, kameralar USB-C formatta bolýy tıis, dep habarlaıdy Egemen.kz Euronews saıtyna silteme jasap.
Brıýsselde bul qadamnyń paıdalanýshylar yńǵaıyna jasalyp otyrǵany habarlanǵan. Sonymen qatar shyǵyndy azaıtyp, ekologııa úshin de tıimdi bolaryn málimdedi.
«Jańa ereje jylyna bir myń tonnadan astam elektrondy qaldyqtardy azaıtady. Bul 10 mln cmartfon nemese 2600 tonna shıkizatqa teń. Búginde shıkizat burynǵydan da qundy ekenin bilesizder», dedi Eýroodaqtyń ishki naryq jónindegi komıssary Terrı Breton.
Bul sheshimniń eń úlken qarsylasy bolǵan Apple kompanııasy «Aıfon» qurylǵylaryna menshikti Lightning qosymshasyn paıdalanýda. Eýropa naryǵyna endi odan bas tartýǵa týra kelip otyr. Apple kompanııasynyń pikirinshe, Brıýsseldiń bul sheshimi salanyń damýy men ınnovasııalar engizilýin tejeıdi. Jańa ereje uıaly telefondar, planshetter, qulaqqaptar, jyljymaly oıyn qurylǵylary, portatıvti dınamıkterge qatysty engiziledi.
«Noýtbýk óndirýshileri úshin jańa erejeler kúshine engennen soń óndiristi beıimdeýge 40 aı ýaqyt beriledi», dep habarlaıdy BBC News.
Sonymen qatar jańa qujat satyp alýshylarǵa gadjetti zarıadtaý qurylǵysymen nemese onsyz satyp alý quqyǵyn berýi kerek.
«Bul zań EO-nyń ónimderdi turaqty etý, elektrondy qaldyqtardy azaıtý jáne tutynýshylardyń ómirin jeńildetý jónindegi jalpy kúsh-jigeriniń bir bóligi», delingen Eýroparlament málimdemesinde.
Parlamentarıılerdiń baǵalaýynsha, bul sheshim tutynýshylarǵa jylyna 250 mıllıon eýroǵa deıin únemdeý múmkindigin berip, qaldyq kólemin jylyna 11 myń tonnaǵa azaıtady.
Arýjan Amangeldi