2022 jyldyń basynan bastap Elektrondyq eńbek bırjasy arqyly halyqty jumyspen qamtý ortalyqtarynyń qyzmetterin usyný jónindegi pılottyq joba sheńberinde jumys izdep júrgen 157,8 myń adam tirkeldi, onyń ishinde 141,5 myń adam jumyssyz mártebesin aldy, dep habarlaıdy Egemen.kz.
Eńbek jáne halyqty áleýmettik qorǵaý mınıstrliginiń málimetinshe, bul rette jumys izdep júrgen adamdar men resmı jumyssyzdardyń ishinen turaqty jáne ýaqytsha jumys oryndaryna EEB arqyly 39,7 myń adam jumysqa ornalastyryldy. Al 23,8 myń jumyssyz azamatqa EEB arqyly jumysynan aıyrylý jaǵdaıy boıynsha áleýmettik tólem taǵaıyndaldy.
Osylaısha, sıfrlyq jumyspen qamtý ortalyqtary arqyly jumysqa ornalasqandardyń úlesi jumys izdep júrgen adamdar retinde tirkelgen izdeýshilerdiń jáne EEB-daǵy jumyssyzdardyń jalpy sanynyń 25%-yn qurady.
Qazir EEB-men barlyq halyqty jumyspen qamtý ortalyqtary ıntegrasııalanǵan, sonyń arqasynda kórsetiletin sıfrlyq memlekettik qyzmetter búkil Qazaqstan boıynsha qoljetimdi. Jumyspen qamtý qyzmetteri úshin ótinishterdiń keminde 50% - y onlaın rejımge ótedi.
Esterińizge sala keteıik, EEB arqyly memlekettik qyzmettiń tórt túrin alýǵa bolady:
– jumys izdep júrgen adamdardy tirkeý;
– jumyssyzdardy tirkeý;
– jumysynan aıyrylǵan jaǵdaıda tólenetin áleýmettik tólemge ótinim berý;
– memleket sýbsıdııalaıtyn jumys oryndaryna (áleýmettik jumys oryndary, qoǵamdyq jumystar, jastar praktıkasy, «Alǵashqy jumys orny», «Urpaqtar kelisimsharty» jáne «Kúmis jas» jobalary) joldama alý.
2021 jyly jumys izdep júrgen 149,1 myń adam onlaın-formatta tirkelgen nemese bul jalpy tirkelgender sanynyń 34%-y, al onyń ishinde azamattardyń 60%-y jumysqa onlaın ornalastyryldy.