Oblystyq Kásipkerlik jáne týrızm basqarmasynyń málimetinshe, bızneske qoldaý kórsetý maqsatynda jylma-jyl bıýdjetten bólinetin qarajat kólemi ósken. Sonyń arqasynda memlekettik baǵdarlamalar sheńberinde qatysýshylar sany 3 ese artty, dep habarlaıdy Egemen.kz.
«Kásipkerlikti damytý Ulttyq jobasy sheńberinde bıyl bıýdjetten 8 mlrd teńge bólindi. Bul ótken jylmen salystyrǵanda 23 paıyz kóp. Onyń ishinde nesıeniń paıyzdyq mólsherlemesin sýbsıdııalaýǵa 6 mlrd teńge, nesıeni kepildendirýge 1,9 mlrd teńge, memlekettik granttar usynýǵa 106 mln teńge berildi. Búgingi kúni 76 kásipkerdiń jobasy qarjylandyryldy», dedi oblystyq Kásipkerlik jáne týrızm basqarmasy basshysynyń mindetin atqarýshy Nurbol Jańabekov.
Onyń aıtýynsha, odan bólek, aýyl kásipkerlerin qoldaý maqsatynda óńirlik baǵdarlama iske asyryldy. Buǵan jergilikti bıýdjetten 2013-2022 jyldarǵa 3 mlrd 357 mln teńge bólindi. Nátıjesinde 531 joba qarjylandyrylyp, 718 jańa jumys orny quryldy. Bul baǵytta osy jyly jergilikti bıýdjetten 500 mln teńge bólindi.
Sondaı-aq «Jumyspen qamtý jol kartasy» baǵdarlamasy sheńberinde ótken jyly ulttyq qordan 1 mlrd teńge bólinip, búgingi kúnge nesıe somasy 510 mln teńgeni quraıtyn 40 kásipkerdiń jobasy qarjylandyrylǵan. Aldaǵy ýaqytta olarmen 46 jańa jumys ornyn qurý josparlanýda.
Aıta keteıik, óńirde 60795 shaǵyn jáne orta kásipkerlik sýbektileri tirkelgen.
Aıana Toǵanbek