Ulttyq ekonomıka mınıstrliginiń basshysy Álibek Qýantyrov Bilim jáne ǵylym mınıstrliginiń bólinýine qatysty fýnksıonaldyq taldaý júrgizý jáne qaıta uıymdastyrý jumystaryna qansha qarajat jumsalatynyn atap ótti, dep habarlaıdy Egemen.kz.
«Bul rette Bilim jáne ǵylym mınıstrliginiń qolda bar bıýdjeti bólinedi. Jalpy biz shyǵyndardyń aıtarlyqtaı ósýin kútpeımiz. Meniń oıymsha, olar az bolady, múmkin burynǵy BǴM bıýdjetiniń aıasynda da bolýy múmkin. Qosymsha shtat sany bólinedi dep te oılamaımyn. Eger ondaı jaǵdaı bolsa, onda basshylyqtyń sheshimi boıynsha qosymsha qarajat bólinedi», dedi Álibek Qýantyrov.
Onyń aıtýynsha, joǵary bilim men ǵylymǵa jatatyn departamentter men qurylymdyq bólimsheler jańa mınıstrlikke kóshedi. Mektepke deıingi jáne mekteptegi bilim berýmen aınalysatyn qurylymdyq bólimshelerge qatysty barlyq nárse bilim mınıstrliginiń qurylymynda qalady.
«Ǵylym jáne joǵary bilim mınıstrligi Mınıstrlikter úıinde nemese basqa ákimshilik ǵımaratta ornalasady. Bul boıynsha qosymsha suraqtar bolmaýy tıis», dep qosty Á.Qýantyrov.
Eske sala ketsek, 1 maýsymda Ulttyq Ǵylym akademııasynyń mereıtoılyq sessııasynda Memleket basshysy Qasym-Jomart Toqaev Qazaqstannyń Bilim jáne ǵylym mınıstrligin eki vedomstvoǵa bólý týraly usynys jasaǵan bolatyn. Onyń aıtýynsha, bul eldegi ǵylymı qyzmetti úılestirýdi kúsheıtý maqsatynda qajet.