Keshendi testileýge qatysý úshin beriletin ótinishter 2022 jylǵy 15-shildege deıin qabyldanady. Tirkeý Ulttyq testileý ortalyǵynyń app.testcenter.kz saıtynda júrgiziledi.
Úmitkerler bilim berý baǵdarlamalary toby, úmitkerlerdiń testileýdi ótkizý tili men orny týraly derekterin ótinimderdi qabyldaý merzimi aıaqtalǵanǵa deıin ózgerister engize alady. Testileý kúni týraly aqparat úmitkerdiń jeke kabınetinde jarııalanady. Al keshendi testileý 20-shildede bastalyp, 10-tamyzǵa deıin jalǵasady.
Ulttyq testileý ortalyǵynyń dırektory Rýslan Emelbaev: «Keshendi testileý elektrondy formatta ótkiziledi jáne úsh bólikten turady: shet tili, oqýǵa daıyndyqty anyqtaý jáne bilim berý baǵdarlamalary tobynyń beıini boıynsha test. Oǵan 4 saǵat beriledi. Shet tilin bilý deńgeıin rastaıtyn halyqaralyq sertıfıkattary bolsa, úmitkerler shet tilinen test tapsyrýdan bosatylady», dedi.
Atalǵan ortalyqtyń habarlaýynsha, talapkerlerge magıstratýraǵa túsý úshin bilim berý
baǵyttarynyń sáıkestigin anyqtaý boıynsha nusqaýlyqtar engizildi. Bul bilim berý baǵdarlamalarynyń sabaqtastyǵyn, úzdiksizdigin saqtaý jáne bakalavrıat mamandaryn daıarlaý sapasyn arttyrý úshin qajet. Sondyqtan belgili bir bilim berý baǵdarlamasyna qujattardy tapsyrar aldynda talapkerler ýnıversıtettiń qabyldaý komıssııasymen keshendi testileýdiń formaty jáne tańdalǵan bilim berý baǵdarlamasy tobynyń talapker alǵan mamandyqqa sáıkestigi týraly keńesýi kerek. Keńesti ýnıversıtettiń vırtýaldy qabyldaý komıssııasynan da alýǵa bolady.
Bıyl ǵylymı-pedagogıkalyq magıstratýraǵa túsý úshin shekti ball – 75, mamandandyrylǵan magıstratýraǵa túsý úshin – 50 ball. Keshendi testileý nátıjelerimen kelispegen jaǵdaıda, úmitkerler testileýden ótkennen keıin onlaın apellıasııaǵa bere alady. Eske sala keteıik, 2022-2023 oqý jylyna arnalǵan magıstratýraǵa 13 myńnan asa grant bólingen.