QARAǴANDY. 23 sáýir. Qaraǵandyda О́ńirlik damý mınıstrligi men jergilikti úı salýshylardyń arasynda daý-damaı tolastamaı tur. Qazirgi kezde órshı túsken janjaldyń týyndaýyna qurylys jumystaryn júrgizýshilerdiń tarapynan bolyp jatqan óreskel qatelikter sebep bolýda. Bul týraly «Ekspress K» habarlady.
О́ńirlik damý mınıstrligi Qaraǵandy qalasy aýmaǵynda jańadan boı kóterip jatqan «Shapaǵat» shaǵyn aýdanynyń keleshegine kúmánmen qaraýda. О́ıtkeni, «Shapaǵat» osydan biraz ýaqyt buryn opyrylyp túsken «Besoba» turǵyn úı kesheniniń ornyna turǵyzyl jatyr. Mınıstrlik ókilderi bul shaǵyn aýdan aty keńge jaıylǵan «Besobanyń» kúıin keshýi ábden múmkin dep otyr. Sondaı-aq, talapqa saı emes, sapasyz dep eseptelingen birneshe úılerdiń tizimine «Qoljetimdi baspana» baǵdarlamasy boıynsha salynyp jatqan qurylystar da engen.
Qurylys isteri jónindegi komıtet pen qurylys jáne turǵyn úı-kommýnaldyq sharýashylyq isteri agenttiginiń mamandary ótken aqpan aıynan beri «Shapaǵat» shaǵyn aýdanyndaǵy turǵyzylyp jatqan úılerge tekserý júrgizgende, sement bloktardyń tym nashar ekenin, álden maıysyp turǵanyn kórgen. Buǵan qosa, baqylaýshylar qabyrǵalardy órýge kúıgen kirpishti emes, arzan, sapasyz shlakobloktardyń paıdalanylǵanyn anyqtaǵan. Sonymen qatar úı salýshylar birqatar tehnıkalyq qajettilikterdi eskermegen.
О́ńirlik damý mınıstrliginiń mamandary, ásirese, bıýdjettiń 700 mln. teńgesine salynyp jatqan kóp qabatty eki úıdiń qurylysyn qatty synaýda. Munyń bireýin qaıtadan demontaj jasaý kerek kórinedi. О́ıtkeni, onyń monolıt ustyndary óz ornynan shamadan tys aýytqyǵan. Mamandardyń aıtýynsha, eger, qurylys isteri osylaı jalǵasa berse, bul úı qulaý qaýpi basym úıler qataryna jatqyzylýy múmkin.
Joldybaı Bazar.
Derekkóz: «Ekspress K».
Foto: azattyg.org.