ALMATY. 23 sáýir. Qazaqstandyq ınternet paıdalanýshylar «Baılanys týraly» Zańǵa ózgerister engenin qalamaıdy. Bul týraly «Ekspress K» habarlady.
Internet paıdalanýshylar túzetilip, endi bekitilýge usynylǵan atalǵan qujatqa Memleket basshysynyń qol qoımaýyn surap, ótinish bildirdi.
Jalpy, ınternet paıdalanýshylarǵa Zańnyń 41-baby 1-bóliminde kórsetilgen talap unamaıdy. Bul bapta áleýmettik jelilerdi qoldanatyn bir adam zań buzýshylyqqa barsa, sol úshin sottyń sheshiminsiz-aq búkil jelini jaýyp tastaýǵa quqyq berilgen. Túsindire sóılesek, «Bárimiz birimiz úshin, birimiz bárimiz úshin!» deıtin keńestik kezeńde jıi aıtylatyn qaǵıda ortamyzǵa qaıta oralǵandaı.
Kóptegen adamdar áleýmettik jeliler tıisti oryndar tarapynan dálel-dáıeksiz, kinási túbegeıli tekserilmesten jabylýy múmkin dep kúmándanýda.
Sondyqtan, ınternet paıdalanýshylar «Baılanys týraly» Zańǵa engizilgen ózgeristerdiń qaıta qaralǵanyna múddeli. Olar bir adamnyń zańǵa qaıshy áreketiniń kesirinen búkil áleýmettik jeli zardap shekpeýi kerek, ıaǵnı, jelilerde «jeldeı esip» túrli jaǵymsyz áreketterge barǵan adamnyń jeke ózi jazalanýy tıis deıdi.
Esterińizge sala keteıik, túzetý engizilgen «Baılanys týraly» Zańdy Parlament senaty maquldap, 2 sáýirde qol qoıýǵa Prezıdentke joldaǵan.
Joldybaı Bazar.
Derekkóz: «Ekspress K».
Foto: Antivirus.ua.