Shyǵarmashylyq ǵumyryn ańyzǵa aınaldyrǵan Pıkassonyń bir otbasynyń dastarqan basyndaǵy kartınasy týraly ótken nómirde jazǵan edik. Jalpy, Pıkassonyń ómiri men óneri haqyndaǵy áńgime taýsylǵan ba?.. Qaýzaı berseń, myń bir túnge jalǵasady. Sol Pablonyń mektepte aty-shýly buzyq bolǵanyn bilesiz be?.. Urynǵannyń jaǵasyn julatynynan bólek, eki sózdiń basyn qosyp, durys jaza almapty. Jalpy, álemge áıdik talantty jandar ónerde juldyzy janǵanymen, kúndelikti tirshilikte «tártipsiz», ómirge epsiz keledi. Áıtpese, «mop-momyn» Pıkassonyń bireýdi uryp nesi bar...
Sóıtken Pablonyń bolashaǵyna alańdaǵan ákesi Hose (ol da sýretshi) balasyna buzyqtyq jasaýǵa múmkindik bermeı, sýret saldyratyn bolǵan. Mine, pıkassolyq dáýirdiń qaınar kózi osy tustan bastalady. Este saqtaý qabileti myqty Pablo bir kórgen adamnyń portretin birden qaǵazǵa túsiretin. Hose de ulynyń talanty ózinen asyp túsetinin baıqap, sýretshilikke baptaı bastady. Tabıǵatynan talantty, maqtaý súıgish bala da áke sózin arman etti. On úsh jasynda Barselona Kórkemsýret akademııasyna, on alty jasynda Madrıdtegi San Fernando akademııasyna qabyldandy.
Pıkassonyń dostary da ózi sekildi kedeı bolatyn. Olar jıi baratyn kafeniń qojaıyny sýret ónerin jaqsy kórgen soń meıirim tanytyp, keıde tegin tamaqtandyratyn. Al Pabloǵa juldyzy janý úshin tek Parıj jetpeı turǵandaı kórinetin. Parıjge barsa, elge tanylyp, baıyp ketetindeı sezinetin. Barselona kafelerinde iship otyryp, Parıj týraly jıi aıtatyn. Sóıtip júrip Pablo Parıjge de jetti. Eńseni basqan bir muńnan arylǵandaı erkin ómir súrdi. Tapqan tabysyn áıelderge shashyp, tipti keıde nan alýǵa aqshasy bolmaıtyn. Pıkassony Parıjde eshkim mensingen joq. Kartınalary da ótpedi.
Dosy Kasagemastyń óliminen soń Pablo túbegeıli ózgerdi: zııandy ádetterinen bas tartyp, tańnan keshke deıin tek sýret sala berdi. Kartına satýmen aınalysatyn kópes Vollar sýretshiniń jolyn ashty. Pıkassonyń týyndylaryn unatqan ol kórme uıymdastyryp, satyp jaqsy tabys tapty.
Sýretshiniń kýbızm stılimen kóp jumys istegenin bilemiz. Ol eń alǵash bul janrda «Avınon qyzdaryn» saldy. Munda jalańash jeńil júristi qyzdardy beıneledi. Jalańash áıeldi salý jańalyq pa? Árıne, joq. Pıkasso áıelderiniń keıbiriniń basy jan-janýardyń basyna uqsaıtyn. Sýret ónerindegi bul erekshelikti árkim árqalaı qabyldady. Shynyn aıtqanda, kóbisi shoshydy.
О́nertanýshylar Pıkasso shyǵarmashylyǵyn túrli kezeńderge bóledi. Ásirese, kýbızm aǵymymen salǵan sýretteri jaqsy satylyp, sýretshiniń qaltasyn qalyńdatty. «Úsh áıel», «Ambrýaz Vollardyń portreti» kartınalary da osy tusta salynǵan-tyn.
Sýretshi kózi tirisinde álemdegi eń baı sýretshi edi. Ol ómirden ótkende baılyǵy 1 mıllıard 100 mıllıondy quraǵan. Bir kezderde nan alýǵa aqsha tappaǵan Pıkasso ózi qalaǵan ómirge aqyry jetti. О́neri jetkizdi.
Pablonyń ómirde mýzalary kóp boldy. Árıne, sýretshiniń birneshe mahabbat hıkaıasy eshkimge jańalyq emes. Álqıssa.
Onyń esimi – Marsel Ýmber. Laqap aty – Eva. Pıkasso Evany shyn súıdi, mýzasy sanady desedi. Tipti Eva beınelengen kartınasyn «Jalańash áıel, Eva, men seni súıem!» dep ataǵan. Alaıda Evamen sýretshiniń baqytty ómiri uzaqqa sozylǵan joq. Erke Eva aýyr dertten kóz jumady. Al bıshi Olga Hohlovamen bas qosyp, uly dúnıege kelgende sýretshi shyǵarmashylyǵynda bir ózgeris baıqaldy. Kartınalarynda kúńgirt boıaý azaıyp, jaryq pen jylylyq kórinetin.
Marııa Valter esimdi boıjetkenniń de Pıkasso ómirine qatysy bar. Marııa sýretshiniń kóptegen kartınasynyń «keıipkerine» aınaldy. «Aına», «Aına aldyndaǵy qyz» kartınalarynyń keıipkeri – dál osy Marııa. Pıkasso qabiriniń janyna qoıylǵan «Qumyra ustaǵan áıel» músininde beınelengen áıel de – Marııa.
Marııadan keıin Fransýaza («Áıel-gúl» kartınasy Fransýazaǵa arnalǵan), odan soń Jaklın Rok. О́miriniń sońǵy jyldarynda avtor negizinen osy Jaklınniń sýretin salady.
Sóz basynda Pablo Pıkassony kúndelikti ómirde «tártipsiz» dep «aıyptap» edik. Sýretshi mýzalarynyń sanyna qarap, sol oıǵa taǵy da bekı túsesiń. Jalpy, turaqsyzdyq, ásirese, óner adamdaryna tán minez dep jatady. Onyń aqıqat ekenin álem tarıhynda talaı talanttar dáleldedi. Ár mýza – sátti kartınanyń sebepshisi. Sýretshi ǵashyqtyǵynan qalar jalǵyz estelik – myń boıaýly kartına. Qyz ketken, sezim sóngen.