Elordada Ulttyq neırohırýrgııa ortalyǵynyń dárigerleri Qyzylorda oblysynan kelgen 16 jastaǵy qyz balanyń mıyna kúrdeli ota jasap, talma syrqatynan qutqardy. Bul ota pasıentke MÁMS júıesinde tegin jasaldy, dep habarlaıdy Egemen.kz.
Anasynyń aıtýynsha, 16 jastaǵy Qaraqat jeti jyl boıy talmasy ustap, aýyryp qala beretin. Alǵash ret 9 jasynda bolǵan. Ustamalary tonıkalyq-klonıkalyq sıpatta, sol qolynan bastalyp, kózin jumyp, basyn ońǵa qaraı 2 mınýtqa deıin buryp qalatyn, osylaı aptasyna 1-2 ret qaıtalanatyn.
«Biz Qyzylorda qalasyndaǵy dárigerlerdiń baqylaýynda boldyq, qurysýǵa qarsy preparattar qabyldadyq, biraq ýaqyt óte kele bul preparattar áser etpeı qaldy, talmasy jıi ustap qalatyn boldy. Balamyzdyń bul aýrýdan aıyǵýyna qalaı kómekteserimizdi bilmedik. Almaty qalasyndaǵy epıleptologtardyń da qabyldaýynda boldyq. Biraq onda bizge operasııa kómektespeıtinin aıtty», dedi Qaraqattyń anasy.
Nevrolog-epıleptolog Gaýhar Sultanhanqyzy Ibatovaǵa konsýltasııa alýǵa kelgende, mı jumysyn tekseretin joǵaryóristi 3-Tesla MRT jáne EEG-monıtorıngi negizinde qyz balada mıdyń oń jaq tóbe bóliginde epıleptıkalyq ustamalar oshaǵyna aınalǵan túzindi isik bar ekeni anyqtaldy.
«Biz pasıentke neıronavıgasııa men mıdyń «qabyǵy» tikeleı jazylǵan elektrokortıkografııany qoldana otyryp, mıkrohırýrgııalyq ota jasap, mıynyń oń jaq tóbe bóligindegi túzindi isikti alyp tastadyq. Naýqas úshin nevrologııalyq jaǵynan jetkiliksizdik bolmaıtyndaı epıleptogendik oshaqqa rezeksııa júrgizildi. Osy ota pasıent jaǵdaıyn jaqsartyp, onyń ómir súrý qalpyn ózgertýge múmkindik beredi dep úmittenemiz», dedi Ulttyq neırohırýrgııa ortalyǵynyń dárigeri.
Ota pasıentke MÁMS júıesinde tegin jasaldy, ári sátti ótti.
«Qyzyma óte kúrdeli ota jasaldy. Otadan keıin birde bir ret talmasy ustamady, balańnyń saýyqqanyn kórgen qandaı baqyt ekenin sózben jetkizý múmkin emes. Qaraqatymnyń senimi men úmiti aqtalǵanyna óte qýanyshtymyn. Mundaǵy dárigerlerdiń bári myqty. Neırohırýrgııa ortalyǵynyń qyzmetkerlerine úlken alǵysymdy bildiremin. MÁMS júıesiniń arqasynda biz óz kezegimizdi uzaq kútken joqpyz jáne de osyndaı qymbat otany bizge aqysyz jasady. Zamanaýı jabdyqtar men bilikti mamandardyń arqasynda kúrdeli ota sátti ótti jáne talma syrqatynan qutqardy», dep alǵysyn bildirdi qyz balanyń anasy.
Aıana Toǵanbek