Bul týraly Ulytaý oblysynda ótip jatqan Ulttyq quryltaıdyń otyrysynda QR Prezıdenti Qasym-Jomart Toqaev aıtty, dep habarlaıdy Egemen.kz.
«Quryltaıǵa Parlament depýtattary, saıası partııalar men Qazaqstan halqy Assambleıasynyń músheleri de shaqyryldy. Úkimettik emes jáne kásibı uıymdardyń ókilderi de shet qalǵan joq. Quryltaı quramyna óńirlik qoǵamdyq keńesterdiń múshelerin qostyq. Men Ulttyq quryltaı atyna zaty saı bolyp, el úmitin aqtaıdy dep senemin. Bizde túrli pikirtalas alańdary bar, biraq quryltaıdyń orny bir bólek. Quryltaı - keń aýqymdy jıyn. Biraq bul jumystyń sapasyna keri áser etpeýi kerek», dedi Qasym-Jomart Toqaev.
Osy oraıda Prezıdent otyrystardy muqııat uıymdastyrý kerek ekenin basa aıtty.
«Bul jerde shyn máninde halyqtyń úni estiliýi tıis. Kez kelgen adamdy quryltaıǵa qatystyrýǵa bolmaıdy. Jurttyń muń-muqtajyn, talap-tilegin jetkizetin azamattar bas qosýy kerek. Bul el birligin nyǵaıtatyn, qoǵamdy uıystyratyn tyń ıdeıalar ortalyǵy bolatyna kámil senemin», dedi Memleket basshysy.
Aıta keteıik, búgin Prezıdent jańadan qurylǵan Ulytaý oblysyna jumys saparymen bardy.
Sondaı-aq keshe Memleket basshysynyń Ulttyq quryltaı qurý týraly Jarlyǵy jarııalandy.