Densaýlyq saqtaý mınıstri Ajar Ǵınııat medısına qyzmetkerlerin kásibı merekesimen quttyqtady, dep habarlaıdy Egemen.kz.
«Medısına - erekshe jan-dúnıeni sezine bilý qasıetin, joǵary kásibı biliktilikti, bilim men tájirıbeni qajet etetin sala. Dárigerler árdaıym adamgershiligimen, janqııarlyǵymen jáne óz isine degen adaldyǵymen erekshelenedi. Medısına - adam týǵannan bastap ómiriniń sońyna deıin arasha túsetin jalǵyz mamandyq. Adamnyń ómir súrýine úmit beretin dáriger. Búgingi tańda Qazaqstanda 260 myńǵa jýyq medısına mamany, onyń ishinde 78 myńnan astam dáriger jáne 189 myń orta medısına qyzmetkeri jumys isteıdi. Elimizde kún saıyn 2 myńnan astam operasııa jasalady, táýligine 600-den astam áıel bosanady, stasıonardan 7 myńnan astam naýqas emdelip shyǵady, emhanalarda 420 myńnan astam adamǵa jáne jedel járdem 19 myń adamǵa qyzmet kórsetedi», delingen mınıstr Ajar Ǵınııattyń quttyqtaýynda.
Onyń aıtýynsha, Qazaqstanda densaýlyq saqtaý salasy qarqyndy damyp keledi. Halyqtyń qalyń tobyna, onyń ishinde aýyl turǵyndaryna qoljetimdi jáne jedel alǵashqy medısınalyq kómekti uıymdastyrý tásilderi qaıta qaralyp jatyr. Joǵary tehnologııalyq kómek kórsetý kólemi ósip, jańa perınataldyq ortalyqtar salynýda. Innovasııalyq baǵdarlamalar engizilip jatyr. Osyndaı jańalyqtardyń arqasynda búgingi kúni sırek kezdesetin jáne kúrdeli aýrýlarǵa sátti dıagnostıka júrgizilip, emdelip júr. Onkologııalyq jáne gematologııalyq aýrýlarǵa kúdik týyndaǵan kezde pasıentterdi tekserýdi jáne emdeýdi jedeldetý úshin «Jasyl jol» engizildi.
«Sońǵy jyldary biz eń mańyzdy eki kórsetkishtiń jaqsarǵanyn baıqadyq - ómir súrý uzaqtyǵy jáne týý kórsetkishi ósti. Qazaqstan Respýblıkasynyń Prezıdenti 2022 jyldy «Balalar jyly» dep jarııalady. Balalardyń densaýlyǵyn saqtaý is-sharalaryn iske asyrý sheńberinde biz profılaktıkaǵa erekshe nazar aýdaramyz. Soǵan baılanysty júrgiziletin zertteýlerdiń aǵymdaǵy kólemin eskere otyryp, balalardy profılaktıkalyq tekserý keńeıtiledi. Osyndaı jetistikterge sizderdiń qajyrly eńbekterińizdiń, óz isine jaýapkershilikpen qaraıtyn sala mamandarynyń eńbegi erekshe zor. Barlyq medısına qyzmetkerlerine qazaqstandyqtardyń densaýlyǵyn saqtaýǵa qosqan baǵa jetpes úlesi úshin shynaıy rızashylyǵymdy bildiremin. Erekshe alǵys sózderin sala ardagerlerine aıtqym keledi. Sizderdiń tájirıbelerińiz dástúrdi saqtaýǵa kómektesip, mamandardyń jańa býynyna úlgi bolary sózsiz», deıdi Ajar Ǵınııat.