Elimizde AES-tiń eki reaktorynyń qurylysyna 10-12 mlrd dollar jumsalýy múmkin. Bul týraly «Samuryq-Qazyna» AQ-niń enshiles kásiporny «Qazaqstan atom elektr stansııalary» JShS baspasóz qyzmeti málimdedi, dep habarlaıdy Egemen.kz.
«Aldyn ala esepteýler boıynsha, Qazaqstanda árqaısysynyń qýaty 1,4 myń MVt bolatyn 2 reaktorly AES salý kerek. Boljam boıynsha onyń qurylysyna 10-12 mlrd dollar jumsalmaq. Sondaı-aq, AES-ti paıdalaný merzimin 60 jyldan 100 jylǵa deıin uzartý múmkindigin qarastyramyz. Jalpy, AES qurlysyn nesıe berý arqyly nemese kommersııalyq joba aıasynda salý usynylady», delingen habarlamada.
«Qazaqstan atom elektr stansııalary» seriktestiginiń málimetinshe, elimizde AES salýǵa 6 sheteldik kompanııa nıet bildirgen.
«Elimizde AES salýǵa nıetti KHNP (Ońtústik Koreıa), EDF (Fransııa), Rosatom (Reseı), NuScale Power (AQSh), CNNC (Qytaı), General Electric-Hitachi (AQSh pen Japonııanyń birlesken kompanııasy) kásiporyndarynan usynys tústi. Biz 3 nemese 3+ býynyna sáıkes keletin reaktorlardy salýdy qarastyryp otyrmyz, óıtkeni olar qaýipsiz. Bul baǵytta bizdiń talaptarǵa saı keletin Reseı, Koreıa, Fransııa jáne Qytaı kompanııalarynyń reaktorlary bar. Al, shaǵyn jáne orta qýatty rektorlardy AQSh-tyń General Electric-Hitachi jáne NuScale kompanııalarynan alý boıynsha kommersııalyq jumystar pysyqtalyp jatyr», delingen málimdemede.
AES salýǵa 6 jyldaı ýaqyt kerek. Degenmen, usynysty qoǵamdyq talqylaýdan ótkizýge, qajetti qujattar daıyndaýǵa da ýaqyt kerek. Jalpy alǵanda, bul 10 jylǵa sozylýy múmkin.