Tobyl tórinde tý kótergen respýblıkalyq dodaǵa elimizdiń 14 óńirinen myń jarymnan astam sportshy qatysyp jatyr. Olar halyq sporty sanatyna engen qazaq kúresi, toǵyzqumalaq, shaǵyn fýtbol, voleıbol, basketbol, gir sporty, qol kúres jáne asyq atýdan synǵa túsýde. Básekede uzyn yrǵasy 34 medal sarapqa salynady.
Ulttyq sport pen buqaralyq mańyzy bar sport túrlerin damytýdy kózdeıtin dúbirli jarystyń ashylý rásimi Tobyl jaǵalaýynda Táýelsizdiktiń 25 jyldyǵy saıabaǵynda ornalasqan amfıteatrda ótti.
Saltanatty is-sharaǵa arnaıy kelip qatysqan Dene shynyqtyrý jáne sport komıtetiniń tóraǵasy Samat Eralıev bıyl jetinshi ret ótip jatqan baıraqty básekege qatysýshylardy ataýly sport merekesimen quttyqtap, jarysta sáttilik tiledi.
– Tórt jylda bir aınalyp keletin halyq sporty oıyndary óńirlerde jyl basynan beri júrip jatyr. Bul jarystarda ár aımaqtyń úzdik sportshylary anyqtaldy. Endi, mine, sol synnan súrinbeı ótken sańlaqtar fınaldyq básekege jınalyp otyr. Halyq sporty oıyndary olımpıada sekildi joǵary deńgeıdegi dúbirli doda dep oılaımyn. Memleket basshysy Qasym-Jomart Toqaev ár Joldaýynda buqara men jasóspirimder sportyna óte zor mán berip otyrady. Olaı bolsa, bul báseke sporttaǵy bıik belesterge bastaıtyn baspaldaq bolǵaı. Bizge osyndaı merekeni uıymdastyryp bergen Qostanaı oblysynyń ákimdigine jáne oblystyq dene shynyqtyrý jáne sport basqarmasyna alǵys aıtamyn, – dedi komıtet tóraǵasy.
Uıymdastyrýshylardyń málimetinshe, halyq sporty oıyndaryna ár aımaqtan 100 shaqty sportshy kelgen. Resmı quttyqtaýlardan keıin óńir ónerpazdary sportshylardyń qurmetine án men kúıden, jyr men bıden shashý shashty.
Saltanatty is-shara barysynda Samat Eralıev Fransııanyń Normandııa provınsııasynda ótken HIH álemdik gımnazııada el qorjynyna olja salǵan qostanaılyq úsh sportshyǵa, atap aıtqanda, batterflıaıdan chempıon bolyp oralǵan Dmıtrıı Eneske, regbıden qola júldegerler Vıktorııa Kýznesova men Marına Denısovalarǵa Mádenıet jáne sport mınıstrliginiń marapatyn tabys etti.
Qostanaı oblysy