Bul týraly búgin Úkimet otyrysynda Ulttyq ekonomıka birinshi vıse-mınıstri Tımýr Jaqsylyqov aıtty, dep habarlaıdy Egemen.kz.
«Memleket basshysynyń tapsyrmasyna sáıkes, Dúnıejúzilik banktiń qatysýymen Ulttyq ekonomıka mınıstrligi memlekettik organdarmen jáne uıymdarmen birlesip, Qazaqstan Respýblıkasynyń 2026 jylǵa deıingi Investısııalyq saıasaty tujyrymdamasynyń jobasyn ázirledi. Tujyrymdama jobasynda kózdelgen negizgi nysanaly ındıkatorlar – negizgi kapıtalǵa ınvestısııalar deńgeıin IJО́-ge 25,1 paıyzǵa deıin jetkizý jáne tikeleı sheteldik ınvestısııalar aǵynyn 2026 jyldyń ózinde 25,5 mlrd AQSh dollaryna deıin arttyrý», dedi vıse-mınıstr.
Onyń aıtýynsha, atalǵan maqsattarǵa qol jetkizý úshin tujyrymdama jobasymen ınvestısııalar tartý saıasatyn qaıta qaraý jónindegi sharalar kesheni kózdelgen. Bul jańa trendterdi eskere otyryp, ınvestısııalar qurylymyn básekege qabiletti, qosylǵan quny joǵary taýarlardy óndirý jaǵyna ózgertýge múmkindik beredi.
«Investısııalyq damýdyń negizgi paıymy árbir salanyń ekonomıkany damytýǵa qosqan úlesin eskere otyryp, ınvestısııalar tartýǵa teńdestirilgen tásilden turady. О́ńdeý ónerkásibi básekege qabilettilikti arttyrýdyń tıimdi draıveri bolyp sanalady. Munda eńbek ónimdiliginiń ósýine, eksport kólemin ulǵaıtýǵa jáne kúrdeliligin arttyrýǵa, neǵurlym joǵary qaıta bólý óniminiń jańa óndirisin ıgerýge, óndiristi kezeń kezeńimen oqshaýlaýǵa basa nazar aýdarylady. Bul rette memlekettik qoldaý jeke kapıtaldyń jetispeýshiligi bar, joǵary tehnologııalyq kapıtaldy qajet etetin jobalardy iske asyrý úshin basymdyq beriledi», dedi Tımýr Jaqsylyqov.