Arqalyq qalasynyń ortalyǵynda Ulttyq dombyra kúni men ult ustazy Ahmet Baıtursynulynyń 150 jyldyǵyna arnalǵan merekelik is-sharalar aıasynda halyq aspaptar orkestri men qala turǵyndarynan quralǵan 1000 adamdyq orkestr óner kórsetti.
Ashyq aspan astyndaǵy alyp orkestr júzdegen qala turǵynynyń aldynda «Tepeńkók», «Salkúreń» sııaqty halyq kúılerin, Qurmanǵazynyń «Balbyraýyn», Nurhan Ahmetbekovtiń «Jeńis» jáne Nurǵısa Tilendıevtiń «Álqıssa» kúılerin oryndady.
Jalpy, buǵan deıin qazaqtyń qasıetti qara dombyrasyn nasıhattap, dáripteýge arnalǵan buqaralyq mádenı sharalar jyl saıyn Amangeldi aýdanynda da ótip turatyn. Alaıda dástúrli shara pandemııaǵa baılanysty úzilip qalyp edi, bıyl Arqalyqta qaıta jandandy.
– Ulttyq aspabymyz, ulttyq ónerimiz ulyqtalǵan is-sharanyń ulaǵaty mol. Osy is-sharaǵa daıyndyq barysynda 700 adam qolyna alǵash ret dombyra ustady. Eń jasy úlken dombyrashy – 87 jasta, eń jas ónerpaz – 8 jasta. Bir áýletten 22 adam óner kórsetkeni de tańdanarlyq jaǵdaı. Arqalyqtaǵy aıryqsha óner merekesi jınalǵan jurtshylyqqa rýh berip, kóńilin kókke kóterip tastady! – deıdi oblystyq mádenıet basqarmasynyń basshysy Erlan Qalmaqov.
Qostanaı oblysy