Eńbek jáne halyqty áleýmettik qorǵaý mınıstri Tamara Dúısenova Qazaqstanda zeınet jasyn tómendetý máselesi boıynsha belsendi top ókilderimen kelissóz júrgizdi, dep habarlaıdy Egemen.kz.
Vedomstvo basshysy Tamara Dúısenova zeınet jasyn 58 jasqa deıin tómendetý boıynsha Qazaqstan áıelder qozǵalysynyń ókilderimen besinshi kezdesý ótkizdi.
Kelissóz barysynda mınıstr arnaıy jumys toby belsendilerdiń usynystaryn jan-jaqty zerttegenin, sondaı-aq zeınetaqymen qamsyzdandyrý júıesin jetildirý boıynsha usynylatyn tásilder týraly habarlady.
Kezdesýge qoǵamdyq qozǵalys ókilderi Maıken Bıgarstanova, Marına Bachaeva, Olga Smırnova, Gúlnár Smaıylhanova, Janar Jıbegenova, Láıla Ospanova, Qarlyǵa Ahmetbekova jáne áıelder isteri jáne otbasylyq-demografııalyq saıasat jónindegi ulttyq komıssııa múshesi Azıza Shýjeeva qatysty.
Jıynda Tamara Dúısenova belsendilerdiń usynysyn mınıstrlik janynan qurylǵan arnaıy jumys toby jan-jaqty zerttegenin aıtty. Bul rette tómendegi faktorlar eskerildi:
1998 jylǵy 1 qańtarǵa deıin, ıaǵnı jınaqtaýshy júıe engizilgenge deıin jınaqtalǵan eńbek ótili úshin alynatyn yntymaqty zeınetaqy júıesi mólsheriniń kemýi; Ekonomıkanyń túrli sektorlaryndaǵy jasy 50-den asqan áıelderdiń tabys deńgeıi; Áıelderdiń zeınet demalysyna erte shyqqan kezdegi zeınetaqysynyń boljamdy mólsheri, olardyń tabysy jáne jınaqtaýshy zeınetaqy júıesine qatysý ótili.Mınıstr eńbek ótili joq jáne búginde jınaqtaýshy zeınetaqy júıesine qatyspaıtyn qazaqstandyqtar úshin 50+ jasynda zeınetke erte shyǵý laıyqty tólemdi qamtamasyz etpeıtinin atap ótti. Bul rette qoldanystaǵy zańnamaǵa sáıkes azamattarǵa zeınetke erte shyǵý quqyǵy beriledi. Osylaısha zeınetaqy qorynda zeınetaqy jınaqtary 55 jasqa (erler) jáne 52,5 jasqa (áıelder) tolǵanda jetkilikti bolǵan kezde qazaqstandyqtar zeınetaqy annýıtetin rásimdeı alady (zeınet jasyna jetkenge deıin zeınetaqy jınaqtarynan tólem alý quqyǵy). Zııandy eńbek jaǵdaılarynda jumys isteıtin azamattar zeınetaqy annýıtetin 40 jastan bastap paıdalana alady, bul rette osyndaı sharttar boıynsha tólemder 50 jastan bastalady.
Tamara Dúısenova qozǵalys belsendilerine azamattardy zeınetaqymen qamtamasyz etýdi jetildirý maqsatynda mınıstrlik ázirlegen jańa tásilder jóninde de aıtyp berdi.
«Birinshiden, biz bazalyq jáne yntymaqty zeınetaqy taǵaıyndaý kezinde parametrlerdi ózgertý týraly bastama kóterdik. Qazir bizdiń usynystarymyz basqa da múddeli memlekettik organdarda qaralady, eger olar qoldaý tapsa – bul kelesi jyldan bastap bıýdjetten tólenetin zeınetaqy tólemderiniń mólsherin ulǵaıtýǵa múmkindik beredi. Jumys istep júrgen jáne bolashaqta qurmetti demalysqa shyǵatyn zeınetkerler de oń áserin tıgizedi. Ekinshiden, biz «Kúmis jas» jobasynyń tetikterin zeınet jasyna deıingi áıelderdiń jumyspen qamtylýyn qamtamasyz etý úshin qaıta qarastyramyz. Atap aıtqanda, biz jobaǵa qatysý merzimin 3 jylǵa deıin ulǵaıtýdy josparlap otyrmyz jáne áıelderdi jumysqa ornalastyrý úshin bıýdjet qarajaty esebinen olardyń jalaqysyn ishinara sýbsıdııalaı otyryp, arnaıy baǵyttardy qarastyramyz. Bul olardyń zeınetke shyqqanǵa deıin jınaqtaýshy zeınetaqy júıesine barynsha belsendi qatysýyna múmkindik beredi. Bul ásirese eńbek ótili az jáne zeınetaqy qorynda jınaǵy az áıelder úshin óte mańyzdy», dedi mınıstr.
Qozǵalys ókilderi Qazaqstan Respýblıkasy Eńbek jáne halyqty áleýmettik qorǵaý mınıstrligi ázirlegen tásilderdi oń baǵalady. Kezdesý sońynda Tamara Dúısenova azamattardy zeınetaqymen qamsyzdandyrý júıesin jetildirý boıynsha jumys jalǵasatynyn atap ótti.