2030 jyly Qazaqstandaǵy jumysqa jaramdy turǵyndardyń 80%-y – 30-ǵa tolmaǵan jastar bolady. Bul týraly Premer-Mınıstr Álıhan Smaıylov Senat depýtatynyń saýalyna bergen jaýabynda aıtty, dep habarlaıdy Egemen.kz.
«Qazir jastardy jumysqa tartý Úkimettiń basty nazarynda. О́zińizge málim, 2000 jyldan bastap 300-400 myń bala dúnıege kelip, el demografııasy ońaldy. Qazir olardyń aldy eńbekke jaramdy jasqa jetti – jumys kúshiniń 60%-y, al 2030 jyly olardyń úlesi 80%-ǵa jetedi. Jastar úshin jyl saıyn 1 mıllıonǵa jýyq jumys orny ashylýy tıis», delingen jaýapta.
Úkimet basshysynyń aıtýynsha, azamattardy tabysty jumyspen qamtý úshin bastapqy teń jaǵdaılar jasalady. Ásirese, jastar úshin túrli tetikter qarastyrylyp jatyr. Olar:
1) Jyl saıyn 100 myńǵa jýyq jasty óndiris oryndaryna jumysqa ornalastyrý;
2) Jambyl oblysyndaǵy pılottyq jobanyń negizinde aýyl jastaryn kooperatıvter arqyly turǵylyqty mekeninde jappaı jumysqa tartý;
3) «Dıplommen aýylǵa» jáne «Jastar praktıkasy» baǵdarlamalaryn qaıta qaraý arqyly óńirlerge jumysqa tartylǵan jastarǵa eńbekaqymen birge ústemaqy jáne dıfferensıalanǵan áleýmettik paket usyný;
4) Jastardyń kásipkerlik bastamalaryn qoldaý úshin granttar bólý. Bıyl jastarǵa arnalǵan 10 myń grant qaralyp otyr, al onyń somasy 1,2 mln teńgege jetkizildi.
5) «Alǵashqy jumys orny» baǵdarlamasy aıasynda jumys berýshilermen birge mektep túlekterin jáne UBT tapsyrmaǵandardy jumyspen qamtý.
«Qaralyp otyrǵan sharalar jastardy jumyspen qamtý jáne jumysqa ornalastyrý problemalaryn sheshýge yqpal etedi», delingen Álıhan Smaıylovtyń jaýabynda.