Qazaqstanda ana men bala ólimin azaıtý maqsatynda zamanaýı talaptarǵa saı perınataldyq ortalyqtar salynyp, búkil perzenthanalar kúrdeli jóndeýden ótedi. Bul týraly Densaýlyq saqtaý mınıstri Ajar Ǵınııat ortalyq kommýnıkasııalar qyzmetinde aıtty, dep habarlaıdy Egemen.kz.
«2014-2015 jyldary bala ólimi jaǵdaılary tym jıiledi. Odan keıingi eki jylda qaıta báseńdep, 2019 jyly qaıta ósim paıda boldy. Bul birinshi kezekte analardyń densaýlyǵyna baılanysty. Sábı ólimi degenimiz – bir jasqa tolmaǵan balalardyń ólimi ekenin eskersek, negizinen kóbi perınataldyq sebepterden kóz jumady. Balalar belgili bir aýrýmen týady degen sóz. Bul baǵytta ne istelip jatyr? Bizdegi perzenthanalardyń, perınataldyq ortalyqtardyń kóbi ótken ǵasyrda salynǵan. Olardyń materıaldyq-tehnıkalyq bazasy baıaǵyda eskirip ketken. Shala týǵan jáne aýrýmen týǵan nárestelerdi bul nysandarda emdep, ustaýǵa tıisti jaǵdaı jasalmaǵan. Nysandar halyqaralyq standarttarǵa saı kelmeıdi. Prezıdenttiń qoldaýymen, tapsyrmasymen Úkimet jańa perınataldyq ortalyqtardyń qurylysyn josparlaıtyn boldy. Sondaı-aq, búkil perzenthanalarda kúrdeli jóndeý júrgiziledi», dedi Ajar Ǵınııat.
Mınıstr sońǵy 10 jylda bala óliminiń kórsetkishi qubylyp turǵanyn aıtty.
«Birinshi jartyjyldyqta pandemııa bastalǵannan beri alǵash ret jalpy ólim-jitimniń azaıýyn baıqap otyrmyz. О́tken 6 aıda halyq arasyndaǵy ólim-jitim 10 paıyz tómendedi. Desek te, densaýlyq saqtaý júıesi túgel, tolyq aýqymmen jumys istep jatyr. Tek COVID ınfeksııasymen ǵana kúresip jatqan joq, aýrýlardyń aldyn alý, joǵary mamandanǵan medısınalyq kómek damyp keledi. Kólik medısınasy, qashyqtan emdeý jolǵa qoıyldy. Elde áleýmettik-ekonomıkalyq ahýal jaqsaryp kele jatqanyn eskersek, densaýlyq kórsetkishteri de jaqsaryp keledi», dedi vedomstvo basshysy.