Sıfrly sheshimderdiń kúndelikti ómirimizge dendep enýine baılanysty kıberqaýipsizdik te alǵy shepke shyqty. Aqshamyz da, qujatymyz da, deregimiz de sıfrlanǵan, soǵan saı olardyń qaýipsizdigin saqtaý da mańyzdy máselege aınaldy. Kıberqaýipsizdikke áste beıjaı qaraýǵa bolmaıdy.
Endi ınternet alaıaqtardy kúndelikti ózimiz qyzmetin tutynyp júrgen elektrondy úkimet portaly arqyly ańdýǵa, anyqtaýǵa bolatyn múmkindik týdy.
Jyl saıyn Qazaqstanda myńnan astam aqparattyq júıeler, onyń ishinde memlekettik organdardyń júıeleri hakerlik shabýyldarǵa ushyraıdy eken. Endi qandaı derekter hakerler men alaıaqtardyń qolynda ekeni jaıly eGov Mobile mobıldi qosymshasynyń kómegimen qadaǵalaýǵa bolady.
«Qazirgi ýaqytta Sıfrlyq damý, ınnovasııalar jáne aeroǵarysh ónerkásibi mınıstrliginiń Aqparattyq qaýipsizdik komıtetimen, «Zerde» holdıngi jáne «Ulttyq aqparattyq tehnologııalar» AQ-men birlesip, elimizdiń azamattaryna eGov mobile qosymshasy arqyly hakerler men alaıaqtardyń qolyndaǵy derekter týraly habarlaý bastamasy pysyqtalyp jatyr. Elektrondy úkimettiń mobıldik qosymshasyndaǵy paıdalanýshynyń jeke kabınetine saıttarda onyń jeke derekterin zańsyz jınaý jáne jarııa etý faktileri anyqtalǵan kezde habarlama keledi. Iske qosý 2022 jyldyń sońyna josparlanyp otyr», dep málimdedi «Ulttyq aqparattyq tehnologııalar» AQ.
Atalǵan ortalyqtyń basqarma tóraǵasy Rostıslav Konıashkınniń aıtýynsha, barlyq azamat hakerlik toptar, alaıaqtar nemese básekelesterdiń jeke derekterdi qandaı oımen qoldanatynyn bile bermeıdi.
«Bizdiń maqsatymyz – paıdalanýshylardy yqtımal jaǵymsyz saldardan barynsha qaýipsizdendirý jáne qoıylǵan mindetti birlesip sheshý úshin eGov mobile qosymshasy arqyly olardyń qupııa sózderi men derekteriniń jarııa etilýi týraly habardar etý jáne eskertý», deıdi ol.
Aıta ketý kerek, 2021 jyly «UAT» AQ qyzmetter men qocymshalardyń qaýipsizdigin qamtamasyz etýdiń ulttyq baǵdarlamasy – Bug Bounty-ǵa qosyldy. Bug Bounty-dyń 10-nan asa elden jınalǵan táýelsiz zertteýshileri bizdiń eGov.kz portalynyń 50-ge jýyq álsiz tustaryn anyqtaǵan. Sáıkesinshe, ol osal tustardy «Ulttyq aqparattyq tehnologııalar» AQ, Sıfrlyq damý, ınnovasııalar jáne aeroǵarysh ónerkásibi mınıstrliginiń qyzmetkerleri sátimen joıa alǵan.
Sıfrlyq damý mınıstri Baǵdat Mýsınniń aıtýynsha, qazirgi kezde elektrondy úkimet portalynyń qyzmetin Qazaqstanda 10 mıllıonnan asa adam paıdalanady.