Osy sóz jeti senator kelgende de kóldeneń tartyldy
Qarapaıym halyq múddesine etene jaqyn bolý, shaǵyn jáne orta bızneske keń jol ashý, kedergi ataýlyny joıý jóninde Elbasy qashannan-aq naqtyly mindetter qoıyp, talapshyldyqty kúsheıtip keledi. «2050» Strategııasyndaǵy aıryqsha arnalardyń biri de osy baǵytta ekeni aıan. Ústimizdegi jyldyń aqpanynda Prezıdent «Qazaqstan Respýblıkasynda kásipkerlik qyzmet úshin jaǵdaıdy jaqsartý jónindegi túbegeıli sharalar týraly» Jarlyqqa qol qoıdy. Bul da shynaıy qamqorlyq, shyn qoldaý, mol múmkindik.
О́tken aptanyń sońyna taman Ońtústik Qazaqstan oblysyna jeti senator keldi. Olar – Parlament Senaty «О́ńir» depýtattyq tobynyń músheleri E.Jumabaev, Q.Aıtahanov, S.Jalmaǵambetova, A.Kúzekov, O.Rahmanberdıev, J.Tóregeldınov, M.Baqtııaruly. Senatorlar shaǵyn jáne orta bıznesti memlekettik qoldaý máselesiniń mánisin zerttep, zerdelemek maqsatta biraz jerlerde boldy, birtalaı jaǵdaılarmen jiti tanysty, depýtattyq toptyń kóshpeli otyrysyn ótkizdi.
Basqosýǵa О́ńirlik damý mınıstriniń birinshi orynbasary Q.О́skenbaev, Aýyl sharýashylyǵy vıse-mınıstri S.Omarov, OQO basshylary, ózge de laýazym ıeleri, oblystyq, qalalyq máslıhattardyń depýtattary, kásipkerler qatysty. Ońtústik óńirindegi kásipkerliktiń, shaǵyn jáne orta bıznestiń oıdaǵydaı damyp kele jatqany, ózgelerge ónege bolarlyqtaı jadyrańqy jetistikterdiń az emestigi atap kórsetildi. Búkil baıtaǵyńyzda 900 myńǵa taman belsendi kásipkerlik sýbektisi bolsa, osynyń 11 paıyzǵa jýyǵy Ońtústikte eken. El kólemindegi kásipkerlikti násip etetin 2,6 mıllıon adamnyń da 11 paıyzǵa jýyǵy osynda ekeni erekshelendi.
Qýanarlyq ta, quptarlyq ta kórsetkishter barshylyq. Desek te, osynaý orta jáne shaǵyn bızneske baılanysty talaı-talaı taǵdyrsheshti tirlikter, qol jetip jatqan qomaqty nátıjeler sóz bolǵanda kóp kisilerdiń: «Qarapaıymdarǵa qashan jeter eken?», «Qarapaıym sharýalarǵa osynyń bári bútin kúıde baryp jatqan joq qoı», «Talaı nárse dittelgen dilgir núktelerine tımeı qalyp qoıa beredi» degen pikirlerdi ashyq aıtyp, kúrsinetini ras.
Joǵary deńgeıdegi jıynda Qýanysh Aıtahanov búı dedi: «Ońtústiktiń bızneske qoldaý kórsetýdegi baǵaly bastamalary basqalarǵa úlgi bolarlyqtaı. Alaıda, aýyldardaǵy kásipkerlerdiń kópshiligi memlekettik qoldaý túrlerinen beıhabar. Qarjy uıymdary nesıelerdi tym joǵary paıyzben beredi. Sol nesıeni alǵysy keletin qarapaıym azamattardyń kepildikke qoıar múlki joq...».
OQO ákimi Asqar Myrzahmetov: «Indýstrııaly aımaq boıynsha tıisti erejeler men zańdar bekitilmegen. Zań mindetti túrde kerek. Sondaı-aq, keńestik kezeńnen keıin toqtap qalǵan zaýyttardy satyp alyp, jumysyn jalǵastyrýǵa arnalǵan zańnama da qajet. Aqıqatyn aıtsaq, «Agrobıznes-2020» baǵdarlamasy iri fermerlik qojalyqtarǵa baǵyttalǵan. Endi soǵan aýyldaǵy qarapaıym sharýalarǵa da qoldaý bolarlyqtaı arnaıy jeńildikter engizilse», degen usynysyn bildirdi.
Kórdińizder me, senatoryńyz da, ákimińiz de «qarapaıym azamat, qarapaıym sharýa» deıdi. Buryndary «Qarapaıymdarǵa qashan...» degen kúrsinis sol qarapaıymdardyń ózderinen jáne solardyń mańaılarynan ǵana, ary ketse, aýyl men aýdan ákimderi tarapynan estilýshi edi. Endi qarapaıymdarǵa baǵyttalǵan birqansha jaǵdaılardyń ázirshe buıyrmaı kele jatqany «О́ńir» depýtattyq toby, iri laýazymdy tulǵalar toqaılasqan bedeldi basqosýda moıyndalǵanyna myń da bir rahmet. Deısiz. Jaqsylyqtyń belgisi, árıne. Uzaǵynan súıindirgeı. Sóz ben is úılese túskeı.
Marhabat BAIǴUT,
«Egemen Qazaqstan».
Ońtústik Qazaqstan oblysy.