Aqtaýda halyqaralyq týrnır aıasynda Naiza Sport Week qazaqstandyq kúres lıgasynyń aptalyǵy ótip, lıga aıasynda ashyq jattyǵýlar, chempıondar men olardyń jattyqtyrýshylarynyń qatysýymen kezdesýler, sheberlik saǵattary ótti. Týrnırdiń qyzyqty sáti teńiz jaǵalaýynda uıymdastyrylǵan Eagle FS jáne Naiza FC-nyń birlesken týrnıri boldy. Sol kúni Aqtaý qalasy ǵana emes, búkil Mańǵystaýdaǵy aýdan-qalalardyń erejesiz jekpe-jekke qumar jastary jan-jaqtan aǵyldy. Saıysqa burynǵy UFC chempıony, reseılik faıter, erejesiz jekpe-jektiń jeńilip kórmegen sheberi Habıb Nýrmagomedovtiń arnaıy kelýi jastardyń qyzyǵýshylyǵyn arttyrsa kerek, 15 myńdaı adam jınalypty.
Aıtpaǵymyz – týrnırdiń nátıjesi emes, týrnır barysynda oryn alǵan keleńsiz oqıǵa haqynda. «Habıb, Habıb!» dep qurmet-qoshemetpen urandatyp, chempıonnyń sońynan dýyldaı ergen jastardan Habıbti arnaıy top – dostary men sportshylar jáne polıseıler oqshaýlap kele jatty. Osy kezde top aldynan júgire shyqqan azamat qyzmetin atqaryp júrgen polıseıdi keýdesinen qos qolymen ıterip jiberip, Habıbti jeteleı jóneldi. Álgi azamattyń qylyǵy jeli qoldanýshylarynyń, ıaǵnı halyqtyń synyna ilikti.
Aqtaýda oryn alǵan keleńsiz oqıǵaǵa oraı zań oryndary shara qoldandy. Aqtaý qalasynyń ákimshilik quqyq buzýshylyqtar jónindegi mamandandyrylǵan sotynyń baspasóz qyzmetiniń habarlaýynsha, azamat T-ǵa qatysty ÁQBtK-niń 434-babynyń 1-bóliginde kózdelgen ákimshilik quqyq buzýshylyq týraly is qaralǵan. Sotta anyqtalǵandaı, «T. 2022 jyly 17 shilde saǵat 01:30 shamasynda Aqtaý qalasy, 15 «a» shaǵyn aýdanynda ótip jatqan sporttyq is-sharalar kezinde, ıaǵnı qoǵamdyq orynda aınalasyndaǵylardy qasaqana syılamaǵan.
Sóıtip, qoǵamdyq tártipti buzyp, tártipti saqtaýǵa shaqyrylǵan polısııa qyzmetkerlerine qyzmettik mindetterin atqarý kezinde kúsh qoldanyp, qoǵamdyq orynda tyıym salý áreketterine baǵynbaı, kúshtep kirip, usaq buzaqylyq jasaǵan» dep tanyldy.
Sot qaýlysymen T. esimdi azamat ÁQBtK-ń 434-babynyń 1-bóligimen kináli dep tanylyp, oǵan ákimshilik jaza retinde 10 táýlikke ákimshilik qamaqqa alý jazasy taǵaıyndalǵan. Sebebi T. buryn birneshe ret ákimshilik jaýapkershilikke tartylǵan eken.
Sot qaýlysy zańdy kúshine engen joq, biraq zańsyzdyq tasada qalmaı zańǵa saı shara qoldanýdyń qaperge alynǵany durys.
Rasynda, erik-jigerin baǵyndyra almaǵan, isine esep bere almaǵan jigittiń áreketi syrt kózge soraqy kórinip-aq turdy. Polıseıdi jekkórýshilik, qyzmetine kedergi keltirý durys pa? Árıne, tártip saqshysy quqyn asyra paıdalansa, zańdy, tártipti buzsa, óz jazasyn alýǵa tıis. Biraq kópe-kórneý olarǵa qol jumsaýdy, basynýdy quptaı almaımyz. Tártip saqshysy – memlekettik qyzmetker, olardy negizsiz qorlaý – memleketti syılamaý bolyp shyqpaı ma?
Tártip saqshylary ishinde eldi qorǵaý, turǵyndardyń qaýipsizdigin qamtamasyz etý barysynda keýdesin aldymen oqqa tosyp, erliktiń úlgisin kórsetip júrgenderi de az emes. Lańkestermen kúreste, el basyna kún týǵan aýyr shaqtarda oqqa ushqan polıseı erlerimizdi qalaı umytamyz?! Olar «polıseı» degen mamandyqty meńgerip, oınap júrip opat bolǵan joq. Olar – Otan aldyndaǵy azamattyq paryzyn atqaryp, el men jerdiń tynyshtyǵyn qorǵaý jolynda janyn qıǵandar. Sondyqtan tártip saqshylaryn orynsyz tómenshiktetip, abyroıy men bedelin alasarta berýge, jigerin jasyta berýge bolmaıdy.
Jasyratyny joq, kásibin asyra paıdalanatyndar qaı salada da kezdesedi. Para alatyn muǵalim men dárigerge, sot pen memlekettik qyzmetshige, bopsalaıtyn jýrnalıstke bola búkil salany joqqa shyǵarýǵa, kezdese qalǵan muǵalim men dárigerdi, jýrnalısti ıterip-túıip qorlaýǵa bola ma?! О́z ómirlerin qaterge tigip órt arasynan turǵyndardy qutqarǵan, qylmyskerdi qýyp jetip tutqyndaǵan, kópirden nemese bıikten sekirip, ómirin qııýǵa bel baılaǵandardy qutqarǵan kezde ǵana polıseıler myqty ma?
Saqshy tártipti qorǵaıdy, ony kim qorǵaıdy?
Mańǵystaý oblysy