QR Indýstrııa jáne ınfraqurylymdyq damý mınıstrligi jer qoınaýyn paıdalaný salasyn sıfrlandyrý jumystaryn júrgizýde. Bul baǵyttaǵy prosester QR Sıfrlyq damý, ınnovasııalar jáne aeroǵarysh ónerkásibi mınıstrligimen birlese júzege asyrylýda, dep habarlaıdy Egemen.kz IIDM baspasóz qyzmetine silteme jasap.
«Sıfrlandyrý jumystary 4 kezeńdi qamtıdy. Atap aıtqanda, qatty paıdaly qazbalardy barlaýǵa lısenzııa berý, qatty paıdaly qazbalardy óndirýge lısenzııa berý, jer qoınaýyn paıdalanýshy rejımine ótý sheńberinde lısenzııa berý jáne jer qoınaýyn paıdalaný týraly sharttarǵa túzetýler engizý boıynsha qosymsha Kelisimdi bekitý syndy qujattyq rásimder qarastyrylǵan», delingen habarlamada.
Keıin atalǵan memlekettik qyzmetterdi pılottyq joba aıasynda elektrondy formatta júzege asyrý júrgiziledi.
«Jer qoınaýyn paıdalaný salasyn sıfrlandyrý elimizdiń ınvestısııalyq tartymdylyǵyn arttyryp, bul tarapta qajetti qujattar sanyn aıtarlyqtaı azaıtýǵa septigin tıgizedi. Sonymen qatar bul prosess túrli ákimshilik kedergilerge tosqaýyl qoıyp, lısenzııa berý kezindegi ashyqtyqty qamtamasyz etedi», delingen QR IIDM baspasóz qyzmetiniń habarlamasynda.