Qonaev qalasynyń mańynda sıntetıkalyq esirtki jasaýmen aınalysqan kúdiktiler anyqtaldy. Tintý barysynda úsh er adam ustaldy, dep habarlaıdy Egemen.kz.
Almaty oblystyq polısııa departamenti ustalǵandardyń biri Almaty qalasynyń, qalǵan ekeýi Ile aýdanynyń turǵyny ekenin habarlady. Olar Qonaev qalasynan bes shaqyrym jerde qorshalǵan aýmaqta eshkim turmaıtyn eki úıde jasyryn esirtki zerthanasyn uıymdastyrǵan.
Atalǵan jerde mefedron óndiretin arnaıy qondyrǵylar ornatylǵany anyqtaldy. Tekserý barysynda kóptegen plastıkalyq ydys pen untaq tárizdi zat jáne arnaıy ólshegish quraldar tabyldy.
Tabylǵan zattar arasynan 52,82 gramm untaqtyń zerthanalyq tekserý barysynda mefedron ekeni anyqtaldy. Sondaı-aq 2 tonnaǵa jýyq hımııalyq suıyqtyq tárkilendi.
«QR QK 297 baby boıynsha tergeý amaldary júrgizilýde. Kúdiktilerdiń biri qamaýǵa alynyp, qalǵan ekeýinen mindetti kelý týraly qolhat alyndy», delingen vedomstvo aqparatynda.