Aqtóbe oblysy Shalqar aýdanynda qatty jel soǵyp, birneshe áleýmettik nysan men úıdiń shatyry ushyp ketti, dep habarlaıdy Egemen.kz.
Oblystyq TJD málimetinshe, kezekshi-dıspetcherlik pýltine Shalqar qalasyndaǵy daýyl týraly aqparat 19 shilde kúni saǵat 21:50-de túsken.
«Qatty jelden №2 mektep shatyrynyń bir bóligi ushyp ketti. Aýdany 100 sharshy metrdi quraıdy. Sondaı-aq «Azamat» sport kesheniniń de shatyrynyń 50 sharshy metr aýmaǵy búlinip, jeke úıdiń shatyry zaqymdaldy», delingen TJD habarlamasynda.
Qatty jelden zardap shekkender tirkelgen joq. Jergilikti atqarýshy bılik tarapynan 22 adam men 5 tehnıka jumyldyryldy.
Sınoptıkterdiń málimetinshe jel jyldamdyǵy sekýndyna 21 metrge jetken.