Nur-Sultan qalasynyń Kólik jáne jol-kólik ınfraqurylymyn damytý basqarmasy qalalyq PD ákimshilik basqarmasynyń kelisimimen birneshe kóshe ýchaskelerinde jóndeý jumystaryn bastady, dep habarlaıdy Egemen.kz qala ákimdiginiń baspasóz qyzmetine silteme jasap.
«Osy jyldyń 21 shildesi men 31 tamyzy aralyǵynda jóndeý jumystarynyń júrgizilýine baılanysty Býrabaı kóshesiniń Qobylandy batyr kóshesinen Shákárim Qudaıberdiuly dańǵylyna deıingi bóligi kólik qozǵalysy úshin tolyǵymen jabylady.
22-23 shilde kúnderi Jangeldın kóshesiniń Jeńis dańǵylynan Jeltoqsan kóshesine deıingi aralyǵy kólik qozǵalysy úshin ishinara jabylatyn bolady», delingen baspasóz habarlamasynda.
Sondaı-aq «QazAvtoJol» UK AQ Aqmola oblystyq fılıalynyń málimetine sáıkes, Nur-Sultan qalasynyń aınalma joly 4 km respýblıkalyq mańyzy bar avtomobıl joly (R-10) kúrdeli qurylys jumystaryna baılanysty jabylady. Aǵymdaǵy jyldyń 15 qazanyna deıin temirjol jelisin salýmen, uzyndyǵy 2,6 km osy jol ótpesiniń boıymen kúrdeli úlgidegi jol tósemesimen aınalma joldy oryndaý josparlanyp otyr.
Sonymen qatar 23 shilde men 5 tamyz aralyǵynda Turan dańǵyly boıyndaǵy Tóle bı kóshesiniń Syǵanaq kóshesinen «Baspana» jáne «Nova City» turǵyn úı keshenderine deıingi ýchaskesindegi kólik qozǵalysy úshin ishinara jabylatyn bolady. Atalǵan ýchaskede asfaltbeton jabynynyń joǵarǵy qabatyn tóseý boıynsha jumystar júrgiziletin bolady.
«Elorda turǵyndary men qonaqtary qala joldarynda keptelis týdyrmas úshin qozǵalys baǵytyn aldyn ala josparlaýy qajet. Keltirilgen qolaısyzdyqtar úshin keshirim suraımyz jáne jóndeý jumystarynyń júrgizilýine túsinistikpen qaraýdy ótinemiz», delingen beıindi basqarmanyń habarlamasynda.