Qostanaı oblysyndaǵy 4 mektepke Abaıdyń, al 3 bilim ordasyna Álıhan Bókeıhannyń esimi berilmek. Bul týraly Úkimettiń tıisti qaýlysy ashyq talqyǵa shyǵaryldy, dep habarlaıdy Egemen.kz.
«Qostanaı qalasyndaǵy №27 mektepke, Rýdnyı qalasyndaǵy №18 mektebine, Jitiqara aýdanyndaǵy №3 mektep-lıseıine jáne Lısakov qalasyndaǵy jalpy bilim beretin №3 mektebine Abaıdyń esimi berilsin. Al, Qostanaı qalasynyń №29 mektebi, Arqalyq qalasyndaǵy Rodına mektebi jáne Rýdnyıdaǵy №2 Qashar mektebi Álıhan Bókeıhannyń atymen atalsyn. Sonmen qatar, Rýdnyı qalalyq № 19 mektebine Ahmet Baıtursynulynyń, al №15 mektebine Mirjaqyp Dýlatulynyń esimi berilsin. Qarasý aýdanyndaǵy qazaq tilinde bilim beretin mektep Ybyraı Altynsarınnyń esimimen atalsyn. Sondaı-aq Amangeldi aýdanyndaǵy N. Krýpskaıa atyndaǵy negizgi bilim beretin mektepke Jumataı Sabyrjanulynyń aty berilsin», dep kórsetilgen qaýlyda.