Aýyl sharýashylyǵy mınıstrligi qarjy ınstıtýttary bergen kredıtter boıynsha syıaqy mólsherlemelerin sýbsıdııalaý túrinde agroónerkásip kesheni sýbektilerin qoldaýdy jalǵastyryp jatyr. Buǵan deıin sýbsıdııalaý jyldyq 17 paıyzdan aspaıtyn nomınaldy syıaqy mólsherlemesi bar kredıtter boıynsha júzege asyrylǵan bolatyn.
Endi qaǵıdalardyń jańa redaksııasyna sáıkes, sýbsıdııalaý Ulttyq banktiń bazalyq mólsherlemesi men jyldyq 7,5 paıyz teńgemen jıyntyq kórinisi retinde eseptelgen nomınaldy syıaqy mólsherlemesinen aspaıtyn mólsherlemede júzege asyrylady.
Buǵan deıin syıaqy mólsherlemelerin sýbsıdııalaý tetigi aýyl sharýashylyǵy tehnıkasyn, jabdyqtar men aýyl sharýashylyǵy janýarlaryn satyp alýǵa, negizgi quraldardy satyp alýǵa, qurylysqa arnalǵan qaryzdar boıynsha syıaqy mólsherlemesin 10 paıyzǵa, aınalym qarajatyn tolyqtyrý boıynsha 7 paıyzǵa, kóktemgi egis jáne egin jınaý jumystaryn júrgizýge 9 paıyzǵa tómendetýdi kózdedi.
Eger qaryz shartyn jasasý kezinde bazalyq mólsherleme jyldyq 14 paıyzdy qurasa, bul jaǵdaıda sýbsıdııalaýǵa jatatyn nomınaldy syıaqy mólsherlemesi 21,5 paıyzdan aspaýǵa tıis.
Qaryz alýshy nomınaldy syıaqy mólsherlemesiniń 6 paıyzyn tóleıdi, Ulttyq banktiń bazalyq mólsherlemesi men 7,5 paıyz jyldyq paıyzdyq jıyntyq somasy men qaryz alýshynyń teńgemen tólegen 6 paıyzy arasyndaǵy aıyrmanyń nátıjesinde alynǵan nomınaldy syıaqy mólsherlemesiniń qalǵan bóligi memlekettik bıýdjetten sýbsıdııalanady (syıaqynyń nomınaldy mólsherlemesi 21,5 paıyz bolǵan kezde AО́K sýbektisi 6 paıyz tóleıdi, memleket 15,5 paıyz sýbsıdııalaıdy).
Sýbsıdııalaýǵa mynadaı baǵyttar jatady: aýyl sharýashylyǵy tehnıkasyn, onyń ishinde aspaly jáne tirkemeli jabdyqtardy satyp alýǵa, sondaı-aq aýyl sharýashylyǵy janýarlaryn satyp alýǵa, negizgi quraldardy satyp alýǵa, qurylys salýǵa (un, mıneraldyq sýlar jáne alkogolsiz sýsyndar óndirýge arnalǵan negizgi quraldardy satyp alýǵa arnalǵan qaryzdardy qospaǵanda) arnalǵan. Sondaı-aq óndiristik prosestiń tehnologııalyq sıkli úshin qajetti aınalym qarajatyn tolyqtyrý men kóktemgi egis jáne egin jınaý jumystaryn júrgizýge arnalyp ta sýbsıdııa usynylady.
«Osylaısha, osy baǵdarlama sheńberinde qoldaý sharttary qarjy naryǵyndaǵy ózgeristerge jedel den qoıý maqsatynda Ulttyq banktiń bazalyq mólsherlemesin eskere otyryp qaıta qaraldy jáne bul sýbsıdııalaý qaǵıdalaryna jıi ózgerister engizý qajettiligin joıady. Joǵaryda atalǵan jańalyqtar aǵymdaǵy jyldyń 25 shildesinen bastap kúshine enedi», delingen vedomstvo habarlamasynda.