Bul týraly burynǵy Bilim jáne ǵylym mınıstri kezindegi qyzmeti týraly esep bergen Oqý-aǵartý mınıstri Ashat Aımaǵambetov aıtty, dep habarlaıdy Egemen.kz.
«Joǵary oqý oryndary oqytýshylarynyń jalaqysy kóterildi. Ol úshin Prezıdenttiń tapsyrmasy boıynsha 2021 jyly professorlyq-oqytýshylyq quram jalaqysynyń eń tómengi deńgeıin belgileıtin buıryqqa qol qoıdym. Bul buıryq jalaqyny burynǵymen salystyrǵanda kóbeıtýge múmkindik berdi. Joǵary oqý ornyna jańadan kelgen oqytýshyǵa 1 stavka úshin keminde 200 myń teńge bekitildi. Al professordyń jalaqysynyń mınımaldy deńgeıi 350-400 myń teńge boldy. Al pedagogıkalyq júkteme deńgeıin oqý jylyna 680 saǵattan aspaıtyndaı etip bekittik. Sondaı-aq ýnıversıtetterdegi shamadan tys bıýrokratııa men tikeleı mindetke jatpaıtyn biraz fýnksııalardy alyp tastadyq», dep jazdy mınıstr Facebook paraqshasynda.
Sonymen birge ol stýdentter men doktoranttardyń shákirtaqysy óskenine toqtaldy. Iаǵnı doktoranttarǵa beriletin stıpendııa 3 jyl ishinde 82 myńnan 200 myńǵa jýyq somaǵa deıin artty. Osy ýaqyt aralyǵynda joǵary oqý oryndaryna túsýge beriletin grant sany da eki ese ulǵaıdy.
«Eń bastysy, baǵdarlamalyq qujattar arqyly 2025 jylǵa deıin stıpendııany, oqytýshylardyń jalaqysyn, stýdenttik granttar sanyn jáne ǵylymdy qarjylandyrýdy ulǵaıtý úshin qarjylandyrý men mindettemelerdi aldyn ala belgilep qoıdyq. El Prezıdentiniń tapsyrmasy arqasynda kóterilgen grant quny ýnıversıtetterimizdegi oqytýshylardyń jalaqysyn arttyrýǵa múmkindik beredi. Sáýir aıynda joǵary oqý oryndarynyń rektorlaryna qosymsha tapsyrma berdik. Osy tapsyrmaǵa sáıkes 2022 jyldyń qyrkúıeginen bastap ýnıversıtetterimizdegi oqytýshylardyń jalaqysy taǵy da kóterilýi kerek. Ol úshin qarajat bar», dedi Ashat Aımaǵambetov.