Jelide Balqash kólinde iri kólemde balyqtardyń qyrylýy týraly beınejazba jarııalandy. Atalǵan faktige qatysty Ekologııa, geologııa jáne tabıǵı resýrstar mınıstrligi resmı aqparat berdi, dep habarlaıdy Egemen.kz.
«2022 jylǵy 27 shildede Instagram jelisinde Jetisý oblysy, Qaratal aýdany, Kópbirlik aýyly mańyndaǵy Qaratal ózenine quıa beristegi Balqash kólinde balyqtardyń iri kólemde qyrylýy týraly beınejazba jarııalandy», delingen habarlamada.
Atalǵan fakt týraly jumys tobyna habarlanǵan.
«Búgin atalǵan faktini tekserip, zertteý maqsatynda Balqash-Alakól oblysaralyq basseındik balyq sharýashylyǵy ınspeksııasynyń, Almaty oblysynyń mamandandyrylǵan tabıǵat qorǵaý prokýratýrasynyń, Almaty oblysy polısııa departamenti jergilikti polısııa qyzmeti basqarmasynyń tabıǵatty qorǵaý jónindegi jedel qyzmetiniń jáne Almaty oblysy ekologııa departamentiniń ókilderinen turatyn jumys toby balyqtar qyrylǵan jerge bardy», delingen habarlamada.
Ekologııa mınıstrligi usynǵan málimetke sáıkes, rastalmaǵan aqparat boıynsha balyqtardy belgisiz bireýler zańsyz aýlaǵan. Keıin ótkizýdiń múmkin emestiginen jáne kúnniń ystyǵynan tez buzylýyna baılanysty olardy sýǵa tastaı salǵan.
«О́lgen balyqtardyń sanyna qatysty tolyq aqparat jumys toby músheleriniń zertteý qorytyndysyna sáıkes qosymsha habarlanady», dep tolyqtyrdy vedomstvo.