Kórnekti túrkolog ǵalym, til biliminiń tarlany, fılologııa ǵylymdarynyń doktory, professor Babash Ábilqasymov dúnııeden ótti, dep habarlaıdy Egemen.kz.
Babash Ábilqasymov 1931 jyly 2 qarashada Atyraý oblysy Isataı aýdanynda dúnıege kelgen.
Babash Ábilqasymovtyń negizgi ǵylymı eńbekteri qazaq ádebı tiliniń tarıhyn zertteýge arnalǵan. Onyń 18 — 19 ǵasyrlardaǵy qazaq ádebı tili, 19 ǵasyrdyń ekinshi jartysyndaǵy ádebı til, alǵashqy qazaq gazetteriniń tili jónindegi monografııalary qazaq ádebı tili tarıhy úshin asa qajetti eńbekterdiń qataryna jatady.
Onda «Túrkistan ýálaıaty» men «Dala ýálaıaty» gazetteriniń, Ybyraı Altynsarın, Abaı Qunanbaıuly shyǵarmalarynyń tili taldanyp, olardyń qazirgi ádebı tilimizdiń bastaý kózi bolyp sanalatyndyǵy ǵylymı turǵyda dáleldendi. Ábilǵazy bahadúrdiń «Shejire-I Túrik» kitabynyń zerttelý tarıhyna sholý jasap, ondaǵy turaqty sóz tirkesterin tildik turǵydan taldady. Shyǵarmany kóne túrki tilinen qazirgi ádebı tilimizge aýdaryp, jeke kitap etip shyǵardy.