Elordada Bas Prokýror Berik Asylovtyń tóraǵalyǵymen ótken alqa otyrysynda prokýratýra organdarynyń birinshi jartyjyldyqtaǵy jumysynyń qorytyndysy shyǵarylyp, aldaǵy kezeńge arnalǵan mindetter aıqyndaldy.
Jyl basynan beri Memleket basshysynyń tapsyrmalaryn oryndaý úshin prokýrorlar kúshin «qańtar tragedııasynyń» sebepteri men egjeı-tegjeıin anyqtaýǵa, terrorlyq shabýyldar men jappaı tártipsizdikterdiń uıymdastyrýshylary men belsendi qatysýshylaryn anyqtaýǵa baǵyttady. Búginde osy oqıǵalardy tergeý nátıjeleri boıynsha sotqa 474 qylmystyq is joldandy, 717 adam sottaldy. Qylmystyq prosesti kezeń-kezeńimen jańǵyrtý jalǵasýda.
Úsh býyndy modeldi engizý aıasynda prokýrorlar 189 myń prosessýaldyq sheshimdi tekserdi. Jyl basynan bastap prokýrorlar erekshe tártip negizinde asa aýyr qylmystar boıynsha 570 aıyptaý aktisin toltyrdy. Jalpy, «prokýrorlyq súzginiń» qorytyndysynda tergeýdiń sotqa deıingi satysynda azamattardyń konstıtýsııalyq quqyqtarynyń buzylý faktileriniń sany azaıdy.
Qylmystyq orbıtaǵa tartylǵan azamattardyń konstıtýsııalyq quqyqtaryn qorǵaýǵa erekshe nazar aýdarylyp otyr. Jyl basynan beri 1 077 tulǵaǵa qatysty negizsiz qylmystyq qýdalaý toqtatyldy. Qyzmettik úı-jaılardan jáne ýaqytsha ustaý ızolıatorlarynan 512 adam bosatyldy. Prokýrorlardyń bastamasy boıynsha 634 adamǵa qatysty sot úkimderi zańǵa sáıkestendirildi, 130 sottalýshynyń jaǵdaıy jaqsardy, 15-i aqtaldy.
Áleýmettik-ekonomıkalyq salada prokýrorlardyń aktileri boıynsha 8 myńnan astam zań buzýshylyq joıyldy. Bıýdjetke 15 mlrd teńgeden astam qarajat qaıtaryldy. Ártúrli jaýapkershilikke 14,5 myń adam tartyldy. Kedendik retteý jáne suıytylǵan munaı gazy naryǵy salasynda tártip ornatyldy. Eleýli buzýshylyqtar, urlyq pen sybaılas jemqorlyqtyń «kóleńkeli» shemalary ashyldy.
Múgedektigi bar adamdardyń quqyqtaryn qorǵaý, medısınalyq buıymdarǵa baǵa belgileý máseleleri, iri kóterme saýda bazarlarynyń qyzmeti boıynsha tekserýler júrgizildi. 184 myńnan astam adamnyń eńbek quqyqtary qalpyna keltirildi, 1,1 mlrd teńgeden astam somaǵa jalaqy boıynsha bereshek óteldi.
Azamattyq, ákimshilik jáne ákimshilik quqyq buzýshylyq týraly ister boıynsha 2,1 myńnan astam sot aktileri túzetildi, 6,7 mlrd teńgege bıýdjet shyǵyndarynyń aldy alyndy. Qadaǵalaýdyń basym baǵyttarynyń biri – bıznesti qorǵaýda aıtarlyqtaı nátıjelerge qol jetkizildi.
Máselen, kásipkerlik salasyndaǵy buzýshylyqtar boıynsha 845 qadaǵalaý aktisi engizildi, 212 mln teńgeden astam somaǵa 5,5 myń ákimshilik óndirý toqtatyldy, 6,2 myńnan astam zańsyz tekserýler men baqylaýdyń ózge de nysandarynyń joly kesildi jáne kúshi joıyldy, 650-den astam adam jaýapkershilikke tartyldy.
Qadaǵalaýshy organ aldynda turǵan mindetterdiń aýqymy men mańyzyna nazar aýdara otyryp, Berik Asylov prokýrorlardan azamattardyń konstıtýsııalyq quqyqtaryn, bıznes pen memleket múddesin keshendi qorǵaýǵa, sondaı-aq qylmystylyqpen kúreste úılestirýshi rólin kúsheıtý keregin tapsyrdy.