Búgin QR Premer-Mınıstiniń orynbasary – Syrtqy ister mınıstri Muhtar Tileýberdi Andorra Syrtqy ister mınıstri Marııa Ýbahpen kezdesti. Kezdesý qorytyndysynda pasporttyń barlyq túri úshin vızalyq talaptardan ózara bosatý týraly kelisimge qol qoıyldy, dep habarlaıdy Egemen.kz.
«Elordaǵa kelgenge deıin Andorra Syrtqy ister mınıstri Almaty qalasyna baryp, birqatar kezdesý ótkizdi. Onyń ishinde qalanyń ákimimen de kelissóz júrgizdi. Qazaqstan men Andorranyń ekijaqty baılanystary turaqty, údemeli sıpatqa ıe, syndarly jáne ózara tıimdi yntymaqtastyqty damytýǵa baǵyttalǵan. Eń ozyq jáne perspektıvaly baǵyt - týrıstik sektor. Osyǵan baılanysty búgingi kelissózderdiń qorytyndysy boıynsha biz pasporttyń barlyq túri úshin vızalyq talaptardan ózara bosatý týraly kelisimge qol qoıdyq. Ol bizdiń elderimiz arasyndaǵy birinshi úkimetaralyq kelisim boldy», dep atap ótti Muhtar Tileýberdi kezdesýden keıin BAQ ókilderine arnalǵan brıfıng barysynda.
Sonymen qatar ol Qazaqstan men Andorra arasyndaǵy shart-quqyqtyq baza eki el halyqtarynyń múddesi úshin odan ári de tolyqtyrylatynyna senim bildirdi.
«Eki el halyqaralyq qurylymdarda bir-birine ózara qoldaý kórsetedi. Qazaqstan men Andorranyń BUU jáne EQYU aıasyndaǵy yntymaqtastyǵy jemisti damyp keledi. Eýropa Keńesi Parlamenttik assambleıasy men EQYU Parlamenttik assambleıasy alańdarynda parlamentaralyq baılanystar damýda. Sonymen qatar biz Andorraǵa Qazaqstan Respýblıkasynyń 2022-2024 jyldarǵa arnalǵan BUU Adam quqyqtary jónindegi keńesine kandıdatýrasyn qoldaǵany úshin alǵysymyzdy bildiremiz», dedi Úkimet basshysynyń orynbasary.