8 tamyzda Uly dala dańǵylynda ornalasqan kópirde qozǵalys ashylady. Bul týraly Nur-Sultan qalasynyń ákimi Altaı Kólginov málimdedi, dep habarlaıdy Egemen.kz.
Avtomobıl kópirin salý boıynsha negizgi jumys aıaqtaldy, osylaısha kópir ústinde qozǵalys ornaıdy. Al kópirdi abattandyrý, onyń ishinde trotýar bóligi boıynsha sońǵy jumystar qatar júredi.
«Sondaı-aq A62 kóshesiniń (A91 kóshesinen Nur-Sultan-Qaraǵandy trassasyna deıingi aralyq) qurylysy júrip jatyr. Bul kóshe Qaraǵandy trassasy men «Nurly Jol» temirjol vokzaly, sol sııaqty qalanyń sol jaǵalaý bóligi arasynda kólik baılanysyn qamtamasyz etedi. Bul mańaıda qozǵalysty aldaǵy kúzde ashýdy josparlap otyrmyz. Atalǵan kóshe aýdandardy jańa kópirmen jalǵaýǵa múmkindik beredi. Uly dala dańǵylyndaǵy kópir Máńgilik el dańǵylyndaǵy, A.Baıtursynuly, R. Qoshqarbaev, J.Nájimedenov kóshelerindegi, Nova city aýdany men «Myńjyldyq» alleıasyndaǵy kólik aǵynyn seıiltýge múmkindik beredi, buǵan qosa jańa «Nurly jol» vokzaly, Telman jáne Promyshlennyı eldi mekenderi, METRO gıpermarketi aýdany, Jumabaev dańǵyly, Júrgenov kóshesi jáne t.b. arasynda baılanysty arttyrady. Esil ózeni arqyly ótetin, kólik qozǵalysyna arnalǵan taǵy bir kópir Táýelsizdik dańǵylynda kelesi jyly ashylady. Bul kópir Táýelsizdik dańǵylyn, jańa temirjol vokzalyn, Qoshqarbaev dańǵylyn, Nájimedenov kóshesin, Áziret Sultan meshitin, Baıtursynuly, Qordaı, Aınakól kóshelerin, Momyshuly dańǵylyn elordanyń sol jaǵalaýymen qosymsha baılanys ornatady», dep jazdy ákim Insagram-daǵy paraqshasynda.