Qazaqstannyń jeti oblysynda avtokólikter ýtılalym men bajdy tólemeı, zańsyz esepke qoıylǵan. Bul týraly IIM málim etti, dep habarlaıdy Egemen.kz.
Ishki ister mınıstrligi zańsyz áreketterge barǵan polıseılerdi anyqtaý úshin túbegeıli sharalar qoldanyp jatqanyn málimdedi.
«Qazirgi ýaqytta IIM Ishki qaýipsizdik basqarmasy elimizdiń jeti oblysynda kórshiles elderden ákelingen kólikterdiń Qazaqstanǵa zańsyz tirkelýi boıynsha qylmystyq isterdi tergep jatyr», dedi IIM krımınal polısııa departamentiniń aǵa jedel ýákili Saǵyndyq Jantemirov.
Tártip saqshylarynyń aıtýynsha, sońǵy úsh jylda eki myńnan asa kólik zańsyz tirkelip, memleketke 10 mıllıard teńgeden astam shyǵyn kelgen.
«Arnaıy operasııanyń qorytyndysy boıynsha, IIM ortalyq apparatynyń qyzmetkerleri jedel-izdestirý is-sharalaryn ótkizý kezinde Shymkentte jaqyn shet elderden kedendik tólemderdi, kádege jaratý alymyn jáne memlekettik bajdy tólemeı ákelingen kólik quraldaryn zańsyz esepke qoıý shemasynyń jolyn kesti. Qalalyq polısııa departamenti prosessıng ortalyǵynyń eki qyzmetkeri sot sanksııasymen qamaýǵa alyndy», dedi IIM ókili.
Ishki ister mınıstrligi Shymkentte zańsyz tirkelgen 53 kólik memleketke 320 mıllıon teńgeden asa shyǵyn keltirilgenin atap ótti.
«Qylmystyq toptyń quramyna deldaldar, halyqqa qyzmet kórsetý ortalyqtaryndaǵy kómekshiler, jalǵan senimhat bergen notarıýstar boldy. Qylmystyq shemaǵa qatysýshylardyń barlyǵy jedel-izdestirý sharalary barysynda anyqtalady», dep málimdedi Saǵyndyq Jantemirov.