2022 jylǵy 5 tamyzdan bastap paıdalanýshylarǵa yńǵaıly bolýy úshin, fıskaldyq derekter operatorlarymen yntymaqtastyq sheńberinde Memlekettik kirister komıteti «Transtelekom» AQ-men birlesip, baqylaý-kassa mashınalarynda «push-salyq habarlamalary» jańa servısin iske qosty.
Birlesken jobanyń basty ıdeıasy – baqylaý-kassa mashınalaryn paıdalanýshylaryna salyq mindettemelerin ýaqtyly oryndaý týraly, onyń ishinde salyq organyna salyq eseptiligin toltyryp, usyný boıynsha tez jáne qoljetimdi túrde eske salý.
Bastapqyda push-salyq habarlamalary baqylaý-kassa mashınalaryn paıdalanýshylaryna merzimderi bastalǵanǵa deıin jáne salyq eseptiligin usyný kezeńinde jiberiledi.
Servıs salyq eseptiligin belgilengen merzimde usyný qajettigi týraly salyq tóleýshilerdi habardar etip otyrady, ıaǵnı eske salady. Nátıjesinde, salyq tóleýshi mindettemelerin ýaqtyly oryndap, salyq organdary shottardy buǵattaý men aıyppul salý sııaqty sharalardy qoldanbaýyna septigin tıgizedi dep kútilýde.
«Búginnen bastap salyq tóleýshiler baqylaý-kassa mashınalary arqyly aılyq, 2-toqsan men 1-jartyjyldyq úshin salyq eseptiligin, onyń ishinde 910.00-nysany boıynsha deklarasııasyn, 2022 jylǵy 15 tamyzdan keshiktirmeı usyný qajettiligi týraly eske salatyn push-salyq habarlamalaryn ala bastaıdy», dep habarlady komıtet ókilderi.