Qazaqstandyq áýe kompanııalar Qytaı men О́zbekstanǵa reıster sanyn arttyratyn boldy, dep habarlaıdy Egemen.kz Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.
Indýstrııa jáne ınfraqurylymdyq damý mınıstrliginiń «Ashyq saǵat alańyndaǵy» kezekti jıynynda áýe tasymalyndaǵy ózekti saýaldar talqylandy.
Beınebaılanys rejıminde ótken jıynda «Eır Astana», «SCAT áýe kompanııasy» jáne «Qazaq Air» syndy otandyq avıakompanııalardyń ókilderi pandemııaǵa baılanysty toqyraýǵa ushyraǵan halyqaralyq turaqty áýe jelilerin qaıta qalpyna keltirý jáne ushý geografııasy aýmaǵyn keńeıtý barysyndaǵy is-sharalardy atap ótti.
Áýe kompanııalary ókilderiniń aıtýynsha, búginde ushýdy qaıta qalpyna keltirý jumystary júıeli júzege asyrylýda.
Búginde halyqaralyq áýe tasymaly 28 memleketke 115 baǵyt boıynsha aptasyna 518 jıilikte oryndalady. Áýe qatynasy ornyqty jolǵa qoıylǵan elder qataryna Ázerbaıjan, Armenııa, Belarýs, Ulybrıtanııa, Germanııa, Gresııa, Egıpet, Úndistan, Iran, Italııa, Katar, Qytaı, Kýveıt, Qyrǵyzstan, Maldıv araldary, Mońǵolııa, Nıderlandy, BAÁ, Polsha, RF, Saýd Arabııasy, Tájikstan, Taıland, Túrkııa, О́zbekstan, Chehııa jáne Ońtústik Koreıa kiredi.
Qazaqstandyq avıa tasymaldaýshylar 2022 jyldyń alǵashqy jartyjyldyǵynda halyqaralyq áýe jelileri arqyly 1,2 mln jolaýshy tasymaldaǵan. Bul kórsetkish ótken jyldyń sáıkes kezeńimen salystyrǵanda 60 paıyzǵa joǵary (0,7 mln).
QR IIDM Azamattyq avıasııa komıteti otandyq áýe tasymaldaýshy kompanııalarǵa ushý geografııasy aýmaǵyn keńeıtýdi talap etýde. Qazir bul tarapta birqatar jumys atqarylýda. Atap aıtqanda, Pákistanmen áýe qatynasyn ornatý boıynsha jumystar júrgizilýde. Sondaı-aq suranystyń artýyna baılanysty Qazaqstan, О́zbekstan jáne Qytaıdyń birqatar qalasyna jańa baǵyttar ashý kózdelgen. Dese de jolaýshylar suranysyn tıisti deńgeıde qanaǵattandyrý múmkin bolmaı otyr.
Máselen, karantındik shekteýlerge baılanysty búginde Qytaıǵa aptasyna 3 reıs qana jasalady. Al pandemııaǵa deıin 40-tan astam áýe tasymaly júzege asyrylatyn. О́z kezeginde suranystyń artýy bılet baǵasyna da óz áserin tıgizýde.
«Biz Qytaıdyń azamattyq avıasııa bıligine reıs sanyn arttyrý boıynsha birneshe ret suranys hat joldadyq. Sonymen qatar jańa áýe baǵyttary men reıster sanyn kóbeıtý boıynsha ózbekstandyq áriptesterimizge de usynys bildirdik. Jýyq arada Qytaı, О́zbekstan jáne Pákistannyń avıasııa bıligine atalǵan máselelerdi jedel sheshýge yqpal etýdi qaıta suraımyz», dedi Azamattyq avıasııa komıteti tóraǵasynyń orynbasary Saltanat Tompıeva.