Jastar arasynda patrıottyq jáne rýhanı qundylyqtardy nasıhattaý, olardyń shyǵarmashylyq múmkindigin ashý jáne azamattyq qoǵamnyń damýyna qoldaý kórsetý maqsatynda qurylǵan «Jas qýat» jastar qoǵamdyq birlestigine bir jyl jarymǵa jýyq ýaqyt qana boldy. Osy azǵantaı ýaqytta jastardyń jańa qoǵamdyq uıymy kóptegen taǵylymdy da qaıyrymdy jumystarǵa uıytqy bolyp keledi.
Jaqynda «Aqtóbe oblysynyń jastar saıasaty máseleleri basqarmasy» MM-niń janynan qurylǵan «Jastarmen jumys jónindegi resýrstyq ortalyǵynyń» qoldaýymen «Jas qýat» JQB Uly Jeńistiń 69 jyldyǵyna oraı soǵys ardagerleri Marııa Zınchenko men Ekaterına Popovıchtiń úılerine arnaıy baryp aýlasyn tazartyp, baý-baqshalyq jer telimderin aýdaryp berdi, úı sharýasyna kómektesti. Senbilikke qatysqan jastar osyndaı 20 Uly Otan soǵysyna qatysýshy men tyl ardagerlerine qolǵabys jasaıtyn bolady. Senbiliktiń maqsaty – ardagerlerdi Uly Jeńis kúnimen quttyqtaý, óskeleń urpaqty ardagerlerdi qurmettep, syılaýǵa baýlý, jastardyń boıynda patrıottyq sezimdi qalyptastyrý, ardagerlerdiń aýlalaryn tazartyp, úı sharýasyna kómektesý, jastar men ardagerlerdiń arasyndaǵy urpaqtar sabaqtastyǵyn qalyptastyrý, sondaı-aq, elimizdiń jastaryn birlikke, tatýlyqqa shaqyrý bolyp tabylady.
Senbilikke «Aqtóbe oblysynyń jastar saıasaty máseleleri basqarmasy» MM-niń janynan qurylǵan «Jastarmen jumys jónindegi resýrstyq ortalyǵynyń» ókilderi, belsendi jastar, joǵary jáne arnaýly oqý oryndarynyń stýdentteri qatysty. «Jas qýat» jastar qoǵamdyq birlestiginiń tóraǵasy Artýr Ospanovtyń málimdeýinshe, mundaı qaıyrymdylyq sharalary alda da jalǵasyn tabatyn bolady.
Satybaldy SÁÝIRBAI,
«Egemen Qazaqstan».
Aqtóbe oblysy.