Jýyrda Arys qalasynda ulttyq sport túrlerinen jarys ótti. Qalalyq ishki saıasat bólimine qarasty «Jastar resýrstyq ortalyǵy» KMM jarysty qala kúni merekesine oraı uıymdastyrypty.
Búginde bul jarys týraly áńgime kóp. Negizi jastar arasyndaǵy dodany tamashalaǵan jurt Aqnur esimdi arýdyń áreketine tánti. Ulttyq salt-dástúrlerimiz dáriptelip, salamatty ómir salty nasıhattalǵan sharada arystyqtarmen birge Shymkent qalasy, Qazyǵurt jáne Ordabasy aýdanynyń jastary qatysyp, arqan tartý, qol kúres, qoshqar kóterý, gir tasyn kóterýden baq synasqan.
Jınalǵan jurtty qyzyqtyrǵany «Qoshqar kóterý» saıysy boldy. Qatysýshylar arasynda óziniń myqtylyǵyn dáleldep, salmaǵy 43 kılo bolatyn qoshqardy 1 111 ret kótergen Azamat Maqulbekov bas júldeni ıelendi. Al qoshqardy 160 ret kótergen Májıt Arhat ekinshi orynǵa, 150 ret kótergen Danııar Aıtbek úshinshi orynǵa ıe boldy. Jarys jeńimpazy Azamat Maqulbekovke ózi kótergen qoshqar berilse, qalǵan júldegerler men qatysýshylarǵa uıymdastyrýshylardyń baǵaly syılyqtary tabys etildi.
Erlerden soń qoshqar kóterý kezegin alǵan arystyq Aqnur esimdi arý tipti birqatar jigitti shań qaptyryp, qoshqardy 64 ret kóterdi. Kópshilikti tańǵaldyrǵan Aqnur Ádilge de arnaıy syılyq tabys etildi.
Jarys qorytyndysy boıynsha júldeli oryn alǵandar arnaıy alǵys hatpen marapattalyp, turmystyq tehnıkalar syıǵa tartyldy. Sondaı-aq Arys qalasynyń órkendep damýyna, jastardyń patrıottyq rýhyn kóterip, salamatty ómir saltyn ustanýda demeýshilik tanytyp júrgen azamattarǵa da alǵys hattar men baǵaly syılyqtar tabys etildi.
Túrkistan oblysy