Alash arystarynyń ómiri men ónegesi jaıly izdený, olardyń ustanǵan jolyn, tulǵalyq ereksheligin óskeleń urpaqtyń sanasyna uıalatý – búgingi bizdiń paryzymyz. Olardyń jan dúnıesi, dúnıege, ortaǵa, sol kezdegi saıasatqa kózqarasy týraly tereńirek tolǵanýǵa bolady. «Qaıtsek qazaqty oıatamyz, ózgelermen terezesi teń ult qylamyz?» dep kúresken salmaqty oıdyń, adal eńbektiń adamdary, anyǵyn aıtqanda, Alash arystarynyń esimi qazaqtyń júreginde máńgi saqtalatyny shúbásiz.
Olardyń esimderin jańǵyrtý úshin birqatar ıgilikti joba bastalyp ketkenine de birtalaı ýaqyt boldy. Jýyqta «Qazaqstan» teleradıokorporasııasy Mirjaqyp Dýlatuly týraly tarıhı telehıkaıasynyń túsirilimin bastady. Tarıhı tulǵanyń ómir jolyndaǵy aıtýly oqıǵalarǵa negizdelgen serıal Alash qaıratkeriniń ómiri, shyǵarmashylyǵy men saıası kúresi jaıynda syr shertedi.
– Bıyl «Qazaqstan» teleradıokorporasııasy 5 tarıhı serıal túsiredi. Olar Maǵjan Jumabaev, Álkeı Marǵulan, Dına Nurpeıisova, Qorqyt tulǵasyna arnalǵan telehıkaıalar jáne eń aýqymdysy 6 bólimnen turatyn osy «Mirjaqyp.Oıan qazaq!» serıaly. О́ndiriske qatysty bolsyn, shyǵarmashylyq prosesterde bolsyn bizdiń mamandar jyl saıyn jańa mektepten ótip, shyńdala túsýde. О́zimiz úshin bıyl taǵy bir jańa tájirıbe engizdik. «Mirjaqyp. Oıan qazaq!» serıalyn spınoff joba retinde usynǵaly otyrmyz. О́tken jylǵy «Ahmet. Ult ustazy» serıalyndaǵy akterler oınaıdy, sondaǵy keıbir oqıǵalar jańadan órbıdi. Iаǵnı bul serıaldaǵy Ahmet te, Álıhan da, bas keıipker Mirjaqyp ta kórermen úshin jaqsy tanys bolady. Túsirilim jumystary Almaty oblysynda, Almaty qalasynda, óziniń týǵan jeri Qostanaı oblysynda ótedi, – dedi «Qazaqstan» respýblıkalyq teleradıokorporasııasynyń Basqarma tóraıymy Lázzat Tanysbaı.
Qazir 6 bólimnen turatyn telehıkaıanyń túsirilim jumystary bastaldy. Negizgi túsirilim Almaty qalasy, Almaty men Qostanaı oblystarynda júrgiziledi. Mirjaqyptyń rólin akter Baqyt Qajybaev somdaıdy, al jary Ǵaınıkamal rólinde aktrısa Zarına Karmen. Telehıkaıanyń ssenarııin Murat Esjan, Ularbek Nurǵalym jáne Ushqyn Sáıdirahman jazǵan. Rejısseri – Murat Esjan, prodıýseri – Aısáýle Ábildaeva. Serıalda Álıhan Bókeıhan rólin Baýyrjan Qaptaǵaı, Ahmet Baıtursynulyn Baıǵalı Esenálıev somdaıdy.