«Onagava», «Takahama» jáne «Sımane» stansııalarynyń operatorlary jergilikti ákimshilikterdiń qoldaýymen AES-tegi qaýipsizdik júıesin jetildirý jumystaryn aıaqtap jatyr, dep habarlaıdy Egemen.kz.
Japonııa Úkimeti 2023 jyldyń jazyna qaraı eldegi jumys istep turǵan atom reaktorlarynyń sanyn 17-ge deıin kóbeıtip, eldiń ártúrli bólikterindegi toqtatylǵan AES energııa bloktarynyń jeteýin paıdalanýǵa berýdi josparlap otyr.
Atap aıtqanda, «Kasıvadzakı-Karıva» AES altynshy jáne jetinshi energııa bloktaryn, «Onagava» AES ekinshi energııa blogyn, «Takahama» AES birinshi jáne ekinshi bloktaryn, «Sımane» AES ekinshi blogyn jáne «Tokaı-2» AES jetinshi energııa blogyn qaıta iske qosý josparlanýda.
Sondaı-aq, Japonııanyń ekonomıka, saýda jáne ónerkásip mınıstrligi AES paıdalanýdyń barynsha ruqsat etilgen merzimin arttyrý múmkindigin qarastyryp jatyr.
Qazirgi ýaqytta reaktorlardyń jumys isteý merzimi 40 jylǵa shektelgen, biraq barlyq talaptar saqtalǵan jáne tekserýden ótken jaǵdaıda merzim taǵy 20 jylǵa uzartylýy múmkin.