Elorda ákimi Altaı Kólginov áleýmettik jelidegi paraqshasynda qazaqstandyq bıznes-qoǵamdastyq ókilderimen kezdesýdiń qorytyndylary jaıynda baıandady, dep habarlaıdy Egemen.kz.
«Ashyq mıkrofon» formatynda ótken jıynǵa «Atameken» UKP basshylary, quqyq qorǵaý jáne qadaǵalaý organdarynyń, salalyq qaýymdastyqtardyń qyzmetkerleri, sondaı-aq advokattar, zańgerler men kásipkerler qatysty.
«Qala ekonomıkasynyń negizin shaǵyn jáne orta bıznes quraıdy. Elordada túrli sektorlarǵa tartylǵan jáne 500 myńǵa jýyq qala turǵyny qyzmet etetin 180 myńǵa jýyq bıznes sýbektisi jumys isteıdi. Turǵyndar kún saıyn olardyń qyzmetterin paıdalanady: bul qoǵamdyq tamaqtaný jáne turmystyq qyzmet kórsetý, sondaı-aq qurylys, medısına, bilim berý salalary. Sondyqtan elordanyń kásipkerlik ahýalyn odan ári jaqsartý tetikteri - búginde ózekti taqyryptardyń biri», dep jazdy Altaı Kólginov Instagram jelisindegi paraqshasynda.
Ákimniń aıtýynsha, jınalysqa qatysýshylar ákimshilik kedergilerdi qysqartý, qurylys salasyn damytý, bas shahardyń dızaın-kody, jer ýchaskeleri men ınjenerlik jeliler, sondaı-aq birqatar jobalardy qarjylandyrýǵa qatysty taqyryptardy talqylady.
«Memleket basshysy shaǵyn jáne orta bıznesti damytý úshin tıisti jaǵdaılardy qamtamasyz etýge jáne qala men eldi damytýǵa jeke ınvestısııalardy tartýǵa erekshe kóńil bóledi. Ákimdik tarapynan bıznes ókilderine júıeli qoldaý kórsetý úshin birqatar sharalar qabyldandy. Bıznesti, ásirese shaǵyn jáne orta kásipkerlikti qoldaýdyń pármendi tetikteriniń biri - «Astana ÁKK» AQ qyzmeti. Áleýmettik-kásipkerlik korporasııa bıýrokratııalyq kidirister men kedergilersiz jer ýchaskelerin, AEA aýmaǵynda «Astana Invest» jáne Indýstrııalyq park arqyly jeńildikti preferensııalar berýge múmkindik beredi. Bul sharalar daǵdarys kezeńinde mańyzdy ról atqardy», delingen elorda ákiminiń jazbasynda.
Sondaı-aq, ol granttar men jeńildetilgen nesıeler túrli baǵdarlamalar boıynsha beriletinin aıtty. Máselen, bıyl jańa bıznes-ıdeıalardy iske asyrý úshin 130-dan astam grant berildi, bul ótken jylmen salystyrǵanda 2 ese kóp. Qoldaý shaǵyn jáne orta bıznes obektilerine ınjenerlik jeliler júrgizý, bıznes shyǵyndaryn qoldaý jáne azaıtý úshin qajetti ınfraqurylym qurý túrinde kórsetiledi. Atap aıtqanda, búginde iQala Qalalyq qyzmetter ortalyǵy men Astana Invest ınvestorlarǵa arnalǵan front-keńsesi tabysty jumysyn jalǵastyrýda.