Elordada Demalys promenad alleıasynda 25-28 tamyz aralyǵynda «Mektepke jol» jalpy respýblıkalyq qaıyrymdylyq aksııasy aıasynda mektep jármeńkesi ótedi, dep habarlaıdy Egemen.kz qala ákimdiginiń resmı saıtyna silteme jasap.
Jármeńke 25-28 tamyz aralyǵynda tańǵy 10-nan keshki 19:00-ge deıin ótedi.
Jármeńkede kásipkerlerdiń de, otandyq óndirýshilerdiń de taýarlary tómen baǵamen usynylady.
Sórelerde ata-analar men balalar mektep kerek-jaraqtarynyń barlyq túrlerin taba alady. Onda qalamdar, dápterler men túrli-tústi boıaýlardan bastap rıýkzaktar men mektep formalaryna deıin bolady.
Sondaı-aq úkimettik emes uıymdardyń, atap aıtqanda, «Quqyq» qoǵamdyq qorynyń jáne balalar men ata-analarǵa arnalǵan psıhologııalyq qoldaý qyzmetiniń jumysyn uıymdastyrý josparlanýda, bul rette balalardyń quqyqtaryn qamtamasyz etý máseleleri boıynsha mamandardyń zańdyq, áleýmettik jáne psıhologııalyq konsýltasııasyn alý múmkindigi bar.
Mektep jármeńkesi konserttik baǵdarlamamen jalǵasady.