Úkimet tıisti qaýlyny qabyldady. Bul jaıynda Oqý-aǵartý mınıstri Ashat Aımaǵambetov Facebook-tegi paraqshasyna jazdy, dep habarlaıdy Egemen.kz.
«Memleket basshysynyń mınıstrlikti bólý týraly sheshimi - otandyq ǵylymnyń da, joǵary bilim berý júıesiniń de, jalpy bilim berý salasynyń damýy úshin de óte mańyzdy. Bul qurylǵan eki mınıstrlikke alǵa qoıylǵan mindetterge jáne problemalardy sheshýge egjeı-tegjeıli nazar aýdarýyna múmkindik beredi.
Endi Oqý-aǵartý mınıstrliginiń quzyryna mektepke deıingi, orta, tehnıkalyq jáne kásiptik, orta bilimnen keıingi bilim berý, qosymsha bilim berý, balalardyń quqyqtaryn qorǵaý máseleleri kiredi. Mınıstrliktiń qaramaǵynda mektepke deıingi, orta, tehnıkalyq jáne kásiptik, orta bilimnen keıingi bilim berý salasyndaǵy sapany qamtamasyz etý máseleleri de bar», dep jazdy mınıstr.
Aıta keteıik, endi elimizdegi joǵary bilim jáne ǵylym máselelerimen Ǵylym jáne joǵary bilim mınıstrligi aınalysady. Kóziqaraqty oqyrman jańa mınıstrliktiń basshysy bolyp Saıasat Nurbek taǵaıyndalǵanyn jaqsy biledi. Sóz barysynda Ashat Aımaǵambetov áriptesine sáttilik tiledi.
«Saıasat Nurbekulynyń mol tájirıbesi, bilimi men joǵary kásibıligi mınıstrlik jumysyn jańa deńgeıge kóterýge múmkindik beretinine senimdimin. Buǵan deıin áriptesim Bilim jáne ǵylym mınıstrligi janyndaǵy jumys toptarynyń quramynda bolyp, osy salalardyń kórkeıip, damýyna septigin tıgizgen mańyzdy jobalardy júzege asyrýǵa úles qosty.
Áriptesterime qazaqstandyq ǵylym men joǵary bilimdi elimizde jáne shet elderde damytý úshin alǵa qoıǵan barlyq jospar men jobany júzege asyrýǵa tilektespin!», dedi ol.