Kerekýdegi emdeý mekemeleriniń qyzmetine shaǵym aıtýshylardyń sany ósip keledi. Emdelýshiler stasıonarlarǵa beriletin joldamany uzaq kútetinderin aıtady. Jyl basynan «Áleýmettik medısınalyq saqtandyrý qorynyń» óńirdegi fılıalynda tirkelgen ótinishter sany byltyrǵymen salystyrǵanda 62,2 paıyzǵa ulǵaıǵan.
Medısınalyq saqtandyrý qoryna qańtar aıynan beri 467 shaǵym túsip, turǵyndar óńirdegi keıbir aýrýhanalar men emhanalardyń durys qyzmet kórsetpeı otyrǵanyna narazylyq tanytty. Degenmen barlyq aryz-shaǵymnyń 6 paıyzy ǵana negizdi dep sanalyp otyr. Qordyń óńirdegi fılıalynyń dırektory Nurlan Qasymov alǵashqy alty aıda Ertis-Baıan óńiri azamattarynan uıymnyń shotyna 14,8 mlrd teńge túskenin, qazirgi kúni saqtandyrylǵan oblys turǵyndarynyń sany 633 myń adamǵa jetkenin aıtady. Al medısınalyq qyzmet kórsetýge 42,8 mlrd teńge jumsalypty.
– Mindetti medısınalyq saqtandyrý engizilgeli beri emhanalarda konsýltatıvti jáne dıagnostıkalyq qyzmetter sany kúrt óskenin kórip otyrmyz. Jyl basynan jalpy somasy 3,8 mlrd teńgege osyndaı qyzmet túrleri kórsetilip, 53 myńnan astam emdelýshi stasıonarlarda em-dom qabyldaǵan. Dári-dármektiń tizimi keńeıtilip, ambýlatorlyq jaǵdaıda preparatpen qamtý qoljetimdi bola tústi. Byltyr bul baǵytta 7,9 mlrd teńge ıgerilse, bıyl jyl basynan 8 mlrd teńge baǵyttalyp úlgergen, – deıdi fılıal jetekshisi.
Mamandar qorǵa túsken aryz-shaǵymdardyń sany 62,2 paıyzǵa ulǵaıǵanyn baıqaǵan. Olardyń oıynsha, bul azamattardyń medısınalyq júıege qatysty saýattylyq deńgeıiniń ósýinen paıda bolǵan. Qańtardan shilde aıyna deıingi aralyqta 574 ótinish tússe, onyń 467-si – aryz-shaǵym. Turǵyndar negizinen emhanalardyń qyzmetine narazylyq tanytady. Belgili bir medısınalyq uıymǵa qatysty shaǵym tússe, qor sarapshylary jospardan tys monıtorıng júrgizýge quqyly. Olar áýeli aqparattyq júıeni zerdelep, aýrý tarıhyn qaraıdy, qajet bolsa emhanaǵa baryp, emdelýshilermen sóılesedi.
«Eger shaǵym shyn máninde negizdi bolsa, biz naqty sharalardy qolǵa alamyz. Jarty jyl ishinde medısınalyq uıymdarǵa 18,7 mln teńgege aıyppul saldyq. Pavlodar qalasyndaǵy №1, 2, 4 emhanalar jáne Ekibastuzdaǵy «Dıskont» emhanasynda zań buzýshylyqtar jıi tirkeledi», deıdi Nurlan Qasymov.
Medısınalyq qyzmetke kóńili tolmaıtyndardyń basym bóligi stasıonarlar men arnaıy dárigerlerge beriletin joldamany uzaq kútetinderin jáne kúrdeli zertteýlerge kezektiń uzyn-sonar qalyptasyp qalatynyn aıtady. Kúte-kúte kúderin úzgender kóbine aqyly qyzmetke júginýge májbúr bolady. Bul másele, ásirese revmotolog, nevropatolog, neırohırýrg dárigerlerine qatysty. Sebebi óńirde mundaı mamandardyń tapshylyǵy baıqalyp otyr.
Pavlodar oblysy