«Berel» memlekettik tarıhı-mádenı mýzeı-qoryǵynda» saq dáýirinen syr shertetin «Shilikti. Patshalar alqabynyń jaýharlary» atty kórmesi ótip jatyr, dep habarlaıdy Egemen.kz.
«Berel» qoryq-mýzeıi men Shyǵys Qazaqstan oblystyq tarıhı-ólketaný mýzeıi birlese uıymdastyrǵan kórmege Zaısan jáne Tarbaǵataı aýdandaryndaǵy Shilikti men Eleke sazy qorymdarynan tabylǵan 400-den astam qundy jádigerler qoıyldy. Eń qundy degen jádigerlerdi atap aıtar bolsaq, 2003 jyly «Báıgetóbe» qorymynan tabylǵan «Altyn adamnyń» zattary, 1960 jyldary S. Chernıkovtyń júrgizgen qazbasy kezinde tabylǵan jádigerler, sondaı-aq 2018-2021 jyldardaǵy zertteýler nátıjesinde Eleke sazy qorymdarynan tabylǵan altyn buıymdar.
«Shilikti. Patshalar alqabynyń jaýharlary» kórmesi mýzeıler arasyndaǵy áriptestikti damytý jáne Shyǵys Qazaqstan oblysynyń tarıhı jerlerin halyqqa keńinen tanystyrý maqsatynda uıymdastyrylǵan.