Oral qalasyndaǵy «Atameken» balalar men jasóspirimder týrızm jáne ekologııa ortalyǵy jazǵy demalys maýsymyn aıaqtady. Jyldaǵydaı munda bıyl da myńdaǵan bala kanıkýl qyzyǵyna batyp, keremet demaldy. Endi olardy jańa oqý jyly, bilim básekesi kútip tur...
Oral qalasynyń dál irgesinde, Shaǵan ózeniniń jaǵasynda balalar demalysyna arnalǵan úıler 1937 jyldan salyna bastapty. Endeshe bıyl «Atameken» balalar men jasóspirimder týrızm jáne ekologııa ortalyǵyna 85 jyl dep aıtýǵa negiz bar eken!
Atyna zaty saı ortalyq sońǵy jyldary jas órendi týǵan jerin súıýge, tabıǵatpen bir bolyp, belsendi ómir súrýge baýlyp keledi.
Mysaly, bıyldyń ózinde munda Oral qalasyndaǵy 52 mekteptiń 10-synyp oqýshylary áskerı oqý-dalalyq jıyn ótkizdi. Iаǵnı 900 bozbala tuńǵysh ret eresek ómirdiń dámin tatyp, Otan aldyndaǵy jaýapkershilikti sezindi.
Al úsh aı jazda bul jerde oqýshylardyń oıyn-kúlkisi bir tynbady. Jeti aýysymǵa bólingen demalys lagerinde jalpy sany 1 myńnan asa ul-qyz demalyp úlgeripti. Olardyń basym bóligi – oqý ozattary, daryndy balalar jáne kómekke muqtaj, ata-ana qamqorlyǵynsyz qalǵan balalar bolǵan.
«Atameken» ortalyǵynyń basshysy, «Úzdik ólketanýshy» tósbelgisiniń ıegeri, óńirde týrızm salasyn damytýǵa erekshe úles qosyp júrgen Aıbolat Qurymbaev «ár bala týǵan ólkeniń tabıǵat tańǵajaıyptaryn, tarıhyn, mádenıetin jetik bilýi kerek» degen prınsıp ustanatyn azamat. Sondyqtan da «Atameken» ortalyǵyna kelgen ul men qyzdyń az ýaqyt ishinde ózgerip, tamasha demalyspen birge estetıkalyq tárbıe alyp shyǵady.
– Bıyl bizdiń ortalyqta demalǵan oqýshylar maǵynaly da mándi demalys ótkizdi dep senimmen aıta alamyn. Bul jerde kórip, úırengen daǵdylary aldaǵy ómirde de paıdaly bolary anyq. Mysaly, olar lager aýmaǵyndaǵy ár nárseniń qaı jerde, qalaı ornatylǵanyn jáne mán-maǵynasyn túsindiretin «Ár zattyń óz orny bar» atty oıyn oınaıtyn. Sondaı-aq qaladaǵy mýzeılerge saıahat jasady, týrıstik, sporttyq oıyndarǵa qatysty, ózende baıdarkamen serýendep, ulttyq qolóner mektepterimen de tanysty. Týǵan jer tabıǵatyn qorǵaıtyn ekologııalyq úıirmelerge qatysyp, ǵylymı-zertteý jumystarynyń da dámin tatty, – deıdi Aıbolat Shamuratuly.
«Atameken» ortalyǵynda bıylǵy kanıkýl qyzyǵyn kórgen 354 bala – ata-anasynyń qamqorlyǵynsyz qalǵan nemese jetim balalar eken. Sondaı-aq jazǵy saýyqtyrý lagerinde Mańǵystaý, Atyraý, Aqtóbe oblystarynan, Reseı Federasııasynyń kórshiles aýdandarynan jáne Batys Qazaqstan oblysyndaǵy aýyldardan arnaıy joldamamen kelgen balalar da esten ketpeıtin demalys kúnderin ótkizgen. Mundaǵy uıymshyldyq, ishki birliktiń kúshti bolǵany sondaı, Oral qalalyq dene shynyqtyrý jáne sport bólimi «Balalar jylyna» arnap ótkizgen spartakıadada atamekendikter komandasy 1-orynǵa ıe bolypty!
– Bıyl 1 maýsym men 21 tamyz aralyǵynda «Atameken» ortalyǵynda barlyǵy 1049 bala demaldy. Onyń ishinde az qamtylǵan 355 bala tegin demalsa, daryndy 200 oqýshy 50% jeńildikpen, 494 bala aqyly esepte demaldy. Ortalyq aýmaǵynda 5 kúndik «Mıras», «Rahat» kúrkeli lageri, «Qaısar» sporttyq, áskerı-patrıottyq erlik lageri uıymdastyryldy. 1-25 maýsym aralyǵynda ótken «Mıras» kúrkeli lagerine 600 bala qatyssa, 27 maýsym men 16 shilde aralyǵynda uıymdastyrylǵan «Qaısar» sporttyq, áskerı-patrıottyq erlik lagerinde 230 bala boldy. Munda oqýshylar shatyr qurýdy, týrıstik qural-jabdyqtardy qoldanýdy, baǵdarlaýdy úırendi, – deıdi «Atameken» ortalyǵynyń ádiskeri Aqmaral Joldybaıqyzy.
О́lketaný – óskeleń urpaqty týǵan jerin súıýge, óz Otanynyń patrıoty bolýǵa baýlıtyn erekshe sala ekenin aıttyq. Aıbolat Qurymbaev basqaratyn «Atameken» balalar men jasóspirimderdiń týrızm jáne ekologııa ortalyǵy óńirdegi jalpy jáne qosymsha bilim berý salasyn ózara úndestirip, Batys Qazaqstan oblysynyń negizgi týrıstik brendin qalyptastyratyn jańa baǵdarlama usynyp otyr. Árıne, bul jerde kadr máselesin júıeli sheshý, materıaldyq bazany nyǵaıtý, baǵdarlamalyq-metodıkalyq qujattar jasaý, úıirme jumystaryn jandandyrý, sporttyq baǵdarlaý baǵytyndaǵy jumystardy damytyp, jasandy jartas salý, júıeli merzimdi basylym shyǵarý sekildi san-salaly mindetter tur.
Batys Qazaqstan oblysy