Jazym degen aıaq astynda. Ispanııadan Qazaqstannyń kórikti jerlerin tamashalaýǵa kele jatqan Fernando Bodelon ushaqta ınsýlt alyp, trapqa da aıaǵy tımeı, aýrýhanadan bir-aq shyqty.
44 jastaǵy ıspandyq buǵan deıin densaýlyǵyna shaǵymdanyp kórmegen adam eken. Qazaqstannyń tanymal týrıstik baǵyttary boıynsha saıahattap kórý úshin Madrıd – Almaty baǵytynda ushyp kele jatyp, qonýǵa birneshe saǵat qalǵanda ózin nashar sezine bastaıdy.
«Ushaqta moınym aýyryp, kúrt túrim bozaryp ketti, qaıta-qaıta qustym. Sodan keıin sol qolym men sol aıaqta álsizdik paıda boldy. Almaty áýejaıyna qonǵan soń meni jedel járdem dárigerleri kútip aldy», dep eske alady sol kúndi Fernando Bodelon.
Týrıst №4 qalalyq aýrýhananyń qabyldaý bólimine kelgen kezde dárigerler onyń jaǵdaıyń aýyr dep baǵalaǵan. Aýrýhana neırohırýrgteri sheteldik qonaqtyń ómiri úshin 27 kún boıy kúresti.
«Mıǵa jasalǵan KT oń gemısferanyń qyrtys asty ıadrolary aımaǵynda qarynshalyq júıeniń buzylýyn, oǵan qosa gemorragııalyq tıpti mı qan aınalymynyń jedel buzylýyn, mıdyń isinýin kórsetti. Naýqas shuǵyl jansaqtaý bólimine jatqyzyldy», deıdi №4 qalalyq klınıkalyq aýrýhananyń qabyldaý bóliminiń meńgerýshisi Magadın Haıroev.
Týrıstiń ómirin saqtap qalý úshin oǵan jedel túrde operasııa jasaý qajet bolyp, ony neırohırýrgııa bóliminiń meńgerýshisi Nurjan Ájibekov, assıstent Eldar Besenov pen anestezıolog Marjan Mýsına qolǵa aldy. Operasııa 60 mınýtqa sozylyp, sátti aıaqtaldy. Dárigerler mıdyń qan aınalymyn qalpyna keltire aldy.
«Biz naýqasqa mı ishilik gematoma drenajyn jasadyq. Operasııadan keıingi kezeń turaqty túrde aýyr ótip, keıinnen ońala bastady. Dárigerlerdiń baqylaýynan keıin Fernandonyń jaǵdaıy jaqsaryp, aýrýhanadan shyǵaryldy», deıdi emdeýshi dáriger, №4 qalalyq klınıkalyq aýrýhananyń neırohırýrgi Aldońǵar Aısaýytov.
Al F.Bodelon aýrýhanadan shyqqannan keıin birden Ispanııaǵa oralypty, qazir onyń ońaltý kýrsynan ótip jatqan jaıy bar. Bolashaqta týrıst oryndalmaǵan saparyn jalǵastyryp, ekinshi týǵan jeri – Qazaqstanǵa qaıta oralýdy josparlap otyrǵan kórinedi.
«Men bul klınıkany, dárigerleri men qyzmetkerlerin qashan da ystyq iltıpatpen eske alatyn bolamyn. Maǵan ómirge ekinshi ret oralýǵa múmkindik bergenderińiz úshin raqmet!», deıdi F.Bodelon.
ALMATY