Nur-Sultanda ústel tennısinen ashyq respýblıkalyq týrnır ótti. Konstıtýsııa kúnine oraı uıymdastyrylǵan jarysta elimizdiń eń beldi oıynshylarynyń birazy qatysty.
Erler básekesinde 22 jastaǵy Dastan Kenjeǵulovtyń asqan sheberligine tánti boldyq. Elimizdiń eń úzdik ústel tennısshileriniń reıtınginde tórtinshi orynda turǵan oraldyq óren barlyq qarsylasyn qapy qaldyryp, bas júldeni oljalady. Fınalda ol 20 jasar shymkenttik Irısbek Artýkmetovten aılasyn asyrdy. Qaraǵandylyq Vladıslav Zaharov qola medaldy moınyna ildi. Áıelder arasynda Shymkent qalasynan kelgen 17 jasar daryndy sportshy Sarvınoz Mırkadırovanyń mereıi ústem boldy. Qazaqstannyń ekinshi raketkasy aqtyq synda ekibastuzdyq Angelına Romanovskaıadan basym tústi. Úshinshi orynǵa Qaraǵandynyń ókili Janerke Kóshkimbaeva taban tiredi.
Sonymen qatar Tımofeı Gerasımenko, Danıal Qanatbaev, Valerıı Fadeev, Aleksandra Smırnova jáne Marat Asqarov túrli atalymdar boıynsha arnaıy syılyqtarǵa ıe boldy.